Tónlistarmaðurinn Ingólfur Þórarinsson, betur þekktur sem Ingó Veðurguð ætlar að áfrýja dómi Héraðsdómi Reykjavíkur sem féll þann 30. maí í meiðyrðamáli hans gegn Sindra Þór Sigríðarsyni Hilmarsson.
„Dómurinn sem féll var bersýnilega rangur. Við tókum stöðuna og áfrýjun varð niðurstaðan,“ segir Auður Björg Stefánsdóttir, lögmaður Ingólfs, í samtali við Fréttablaðið.
Sindri Þór Sigríðarson var sýknaður af öllum kröfum Ingólfs Þórarinssonar, eða Ingós veðurguðs, í meiðyrðamáli sem hann höfðaði gegn honum vegna ummæla á Internetinu.
Meðal ummæla sem Sindri Þór lét falla á samfélagsmiðlum á þessum tíma var: „Maður sem er svo þekktur fyrir að ríða börnum.“
Í skýrslutöku við aðalmeðferð málsins í byrjun maí sagðist Ingó aldrei hafa sængað hjá stúlkum á grunnskólaaldri né börnum undir 18 ára. Þá sagðist hann aldrei hafa heyrt sögusagnir um neitt slíkt.
Sindri Þór var spurður hvort hann hefði getað verið hófstilltari í orðavali í ummælum sínum um Ingó en hann sagðist ekki vera týpan til að tala undir rós. „Ég sá ekki ástæðu til þess. Ég var að lýsa því sem ég hafði orðið áskynja í umræðunni.“
Athygli vakti við aðalmeðferð málsins að ekkert fimm vitna sem verjandi Sindra Þórs kallaði til lýstu persónulegri reynslu af Ingó fyrir héraðsdómi.
