„Ég ákvað fyrir nokkru síðan að loka síðunni minni á Facebook fyrir öðrum en vinum eftir að kona nokkur hafði gert sig þar heimakomna og notaði hana til að dreifa áróðri til stuðnings innrás Rússa í Úkraínu,“ skrifar Ingibjörg Sólrún Gísladóttir, fyrrum utanríkisráðherra Íslands á Facebook.
„Eftir nokkra skoðun komst ég að þeirri niðurstöðu að konan væri líklega ekki til í raunheimum heldur væri hún s.k net-tröll gert út af óprúttnum aðilum til að dreifa áróðri fyrir afturhaldssöm öfl. Nú sé ég að ,,kona” þessi birti grein í Mbl í gær til stuðnings innrásinni og ég vil nota tækifærið til að vara fólk við henni en hún skrifar undir nafninu Ingibjörg Gísladóttir!“ bætir hún við.
Alnafna hennar Ingibjörg Sólrúnar, Ingibjörg Gísladóttir hefur verið iðinn við að skrifa áróður gegn Úkraínumönnum og styðja við Rússa í greinum í Morgunblaðinu síðustu daga. Nú síðast í gær.
