Inga segir hingað og ekki lengra: „Það er hver að verða síðastur til að taka í taumana“

„Er ekkert undar­legt við það, að á sama tíma og allir for­menn þing­flokka á Al­þingi vinna að breytingum stjórnar­skrárinnar, þá skuli það einungis vera for­maður Flokks fólksins sem krefst fullrar greiðslu fyrir að­gang að sjávar­auð­lindinni? Aðrir vilja „sann­gjarnt“ eða „eðli­legt verð fyrir aflann.“

Þetta segir Inga Sæ­land, for­maður Flokks fólksins, í að­sendri grein í Morgun­blaðinu í dag.

Þar skrifar Inga um sjávar­auð­lindina og kvóta­kerfið og segir að setja eigi reglur um fullt verð fyrir að­gang, ekki bara sjávar­auð­lindinni heldur einnig öðrum auð­lindum sem landið okkar hefur að gefa og eru ekki skil­greindar sem einka­eign.

„Þjóðin tók af allan vafa“

„Eftir þjóðar­at­kvæða­greiðslu um til­lögur stjórn­laga­ráðs haustið 2012 eftir langt ferli endur­skoðunar­vinnu um stjórnar­skrá lýð­veldisins Ís­lands kom skýr vilji þjóðarinnar í ljós hvað lýtur að því að í nýrri stjórnar­skrá verði náttúru­auð­lindir sem ekki eru í einka­eigu lýstar þjóðar­eign. Þjóðin tók af allan vafa þar sem 82,9% þeirra sem tóku af­stöðu sögðu JÁ.“

Inga segir að það ó­á­sættan­legt að ætla að fá „sann­gjarnt“ eða „eðli­legt“ verð fyrir að­gang að sjávar­auð­lindinni. Það gangi ekki að það sé undir geð­þótta hags­muna­tengdra stjórn­mála­manna hvað telst sann­gjarnt eða eðli­legt gjald hverju sinni. Þannig gæti króna þótt sann­gjarnt hjá ein­hverjum en 0 krónur hjá ein­hverjum öðrum.

„Hundruð milljarða hafa flætt til fárra fjöl­skyldna sem telja sig eiga nánast allan ó­veiddan fisk í sjónum um­hverfis landið og það til fram­tíðar. Milljarðar hafa farið í að sölsa undir sig eignar­hald í nánast öllu sem nöfnum tjáir að nefna og koma sjávar­út­vegi ekkert við. Allt í boði hags­muna­gæslu­pólitíkusanna sem gefa lítið fyrir sam­fé­lags­lega á­byrgð og vel­ferð þeirra sem ekki hafa ráð á að styrkja þá með stæl. Það er hver að verða síðastur til að taka í taumana og neita að verja þetta rán á því sem þjóðin á öll saman.“

Arðránskerfi

Inga er þeirrar skoðunar að það sé löngu kominn tími til að al­þingis­menn axli þá á­byrgð sem þeim ber. „Það er ekki nóg að hrópa að við búum við besta fisk­veiði­stjórnunar­kerfi í heimi þegar stað­reyndin er sú að við búum við eitt það versta arð­ráns­kerfi sem um getur.“

Inga segir að Flokkur fólksins vilji aftur­kalla allar fisk­veiði­heimildir á næstu fimm árum og þá reyni á laga­á­kvæði um að aftur­köllun tíma­bundinna veiði­heimilda myndi ekki bóta­kröfu á ríkis­sjóð.

„Veiði­heimildir á öllum nytja­stofnum í ís­lenskri lög­sögu verði boðnar upp. Það er þrugl að þeir ríku gætu keypt allan aflann og að það yrði al­gjör sam­þjöppun í greininni. Hún er þegar til staðar. Flokkur fólksins vill kvótann heim. Þjóðin á sjávar­auð­lindina sem og allar aðrar auð­lindir landsins sem ekki eru í einka­eign.“