„Það er því ekki að undra að íslensku Orkarnir kætist, en svo kýs ég að kalla þá auðmenn sem vilja hagnast gríðarlega á því að selja orku þjóðarinnar úr landi í gegnum sæstreng,“ segir Inga Sæland, formaður Flokks fólksins, í aðsendri grein í Morgunblaðinu í dag.
Í grein sinni bendir Inga á þau ótíðindi sem berast af orkumálum í Evrópu. Orkuverð hefur rokið upp að undanförnu og nefnir Inga að dæmi séu um að fólk fái allt að 200 prósentum hærri reikninga fyrir hita og rafmagni en fyrir ári.
„Sums staðar stefnir jafnvel í þrefalda hækkun orkuverðs miðað við veturinn á undan. Heimilin, sem verða harðast úti, eru ofurseld þeirri fátæktargildru að hafa hvorki efni á reglulegri upphitun á veturna né kælingu á sumrin.“
Inga segir að í ljósi þessu sé ekki að undra að „íslensku Orkarnir“ kætist.
„Þessir Orkar hinnar íslensku Hringadrottinssögu sjá fyrir sér uppgrip í eigin vasa eftir að Alþingi Íslendinga samþykkti orkupakka 3 fyrir þremur árum. Það var misráðið. Að halda því fram að hægt sé að samþykkja orkustefnu ESB en segja NEI við sæstreng, er áþekkt því að samþykkja frjálst flæði vöru en neita að byggja hafnir til að taka á móti vörum. Takist Orkunum sú fyrirætlun að selja orku íslenskra auðlinda til Evrópu í gegnum sæstreng, má líkja afleiðingunum við stórslys.“
Inga segir að í fyrsta lagi muni orkuverð til almennings á Íslandi hækka gríðarlega. Ekki megi mismuna íbúum á evrópska orkumarkaðnum.
„Önnur neikvæð áhrif raforkusæstrengs eru náttúruspjöll ásamt stórtækum ruðningsáhrifum í hagkerfinu. Orkugeirinn myndi soga til sín fjármagn og mannafla á kostnað annarra atvinnugreina.“
Inga segir að Flokkur fólksins heiti á landsmenn að hjálpa til að við að sporna við raforkusæstreng af öllum mætti, hvað þá að ríkisfyrirtæki leggi áhættufjármagn í sæstreng.
„Með hækkandi heimsmarkaðsverði á orku getur Ísland hins vegar orðið grænt orkustórveldi með framleiðslu rafeldsneytis á borð við vetni til útflutnings. Flokkur fólksins vill tryggja að ávinningur slíks útflutnings renni til þjóðarinnar allrar,“ segir hún.
Inga rifjar svo að lokum upp að Landsvirkjum hafi nýverið birt fréttir af methagnaði á fyrri hluta árs 2022 að upphæð 19 milljarðar króna.
„Því stefnir á árshagnað 2022 nálægt 35-40 milljörðum. Hér fer það saman að Landsvirkjun hagnast ofboðslega um leið og þrengir að lífskjörum þeirra sem þurfa að velta hverri krónu á milli handanna til að sjá sér og sínum farborða. Þar má nefna stórfelldar hækkanir húsnæðislána, matvælaverðs og eldsneytis. Stefna Flokks fólksins er skýr. Við viljum tryggja að ávinningur af orkuframleiðslu renni til eigenda auðlindanna, íslensks almennings, bæði í formi lágs orkuverðs og rentu af auðlindunum. Eðlilegt er að hugsa sér 25-30 milljarða árlegar greiðslur Landsvirkjunar í Velferðarsjóð sem brýnt er að komi til framkvæmda strax. Þannig má létta byrðar almennings, sérstaklega tekjulægra fólks, öryrkja og aldraðra.“
