Inga Sæ­land sár og reið: „Mér finnst þetta rangt og lái mér hver sem vill“

„Seint hefði ég trúað því að ég ætti eftir að sjá frelsarann Jesú Krist með vara­lit, kinna­lit og brjóst,“ segir Inga Sæ­land, for­maður Flokks fólksins, í að­sendri grein í Morgun­blaðinu í dag.

Í greininni skrifar Inga um aug­lýsingu Kirkjunnar þar sem sjá má Jesú Krist með brjóst og vara­lit. Um er að ræða kynningar­efni fyrir Sunnu­daga­skólann og er ó­hætt að segja að margir hafi lýst skoðun sinni á málinu undan­farna daga.

Inga til­heyrir þeim hópi sem er ó­sáttur við myndina og segir hún dapurt að sjá hvernig æðstu em­bættis­menn þjóð­kirkjunnar, með biskup í farar­broddi, ala á upp­lausn og sundrung trú­bræðra sinna og -systra.

„Sjálf þjóð­kirkjan hefur blásið til aug­lýsinga­her­ferðar þar sem sú mynd sem dregin er upp af frelsaranum særir og hryggir marga þá sem trúa í ein­lægni á hann. Jesús breiddi út faðminn og elskaði alla jafnt. Sam­tíma­heimildir eru til um hann. Þess vegna er undar­legt að því skuli jafn­vel hafa verið fleygt að Jesús sé hugar­burður og hafi aldrei verið til. Það var hann, alveg eins og heim­spekingarnir Platon og Sókrates, sem þó voru uppi mörgum öldum fyrir Krists burð, og speki þeirra enn í dag kennd við alla virtustu há­skóla heims.“

Inga segir að myndin af Jesú sé í raun skop­mynd og til marks um veika stöðu kirkjunnar.

„Við sem trúum á Guð vitum að Jesús er sonur hans. Mér var kennt að virða kristna trú, virða kirkjur og trúar­tákn, virða presta og annað starfs­fólk kirkjunnar og að ég ætti að hegða mér í sam­ræmi við kær­leiks­boð­skap kristinnar trúar. Mér finnst eins og þjóð­kirkjan sé að reyna að þvinga upp á mig þeirri sýn að Jesús Kristur hafi verið „alls konar“. Fallist ég ekki á slíkt hljóti ég að vera vond manneskja sem skilur ekki inn­tak kær­leikans. Það sem hér er á ferð er inn­ræting sem hefur ekkert með kristna trú að gera.“

Inga segist horfa á myndina og velta fyrir sér hvílíkt dóm­greindar­leysi hljóti að ráða för hjá biskupi Ís­lands og starfs­fólki Biskups­stofu. Boðun kirkjunnar eigi að vera al­menn, ekki sér­tæk.

„Til hvers þarf að ráðast að trúar­vitund fólks með þessum hætti og um leið brjóta niður þá í­mynd sem Jesús Kristur hefur haft í huga flestra þeirra sem telja sig kristinnar trúar? Hvaða mark­mið og til­gangur er hér að baki? Hvernig á það að þjóna kristni að efna til ó­friðar og ill­deilna sem hér er gert? Hér er biskup einungis að færa ó­vinum kirkjunnar vopn í hendur. Hún er að skemmta skrattanum. Mér finnst þetta rangt og lái mér hver sem vill.“