Inga Sæland, formaður Flokks fólksins, sá sér ekki fært að mæta í Kryddsíldina á Stöð 2 af ótta við að hún myndi smitast af kórónuveirunni frá Þórdísi Kolbrúnu Reykfjörð Gylfadóttur, utanríkis- og þróunarsamvinnuráðherra.
Þetta kom fram í upphafi Kryddsíldarinnar sem fram fer á gamlársdag á hverju ári. Þar mætast leiðtogar þeirra stjórnmálaflokka sem eiga sæti á Alþingi, en eins og kunnugt er hefur Covid-19 haft mikil áhrif á landsmenn undanfarna daga. Bjarni Benediktsson, formaður Sjálfstæðisflokksins, er í einangrun en Þórdís Kolbrún mætti í hans stað eftir að hafa losnað úr einangrun í gær. Í upphafi þáttar kom fram að Inga óttaðist að Þórdís gæti borið með sér smit þrátt fyrir að Þórdís væri ekki lengur í einangrun.
Í samtali við Vísi segir Inga að þátttaka Þórdísar Kolbrúnar í þættinum hafi haft nokkuð með ákvörðun hennar að gera. Inga benti einnig á að mikill fjöldi smita í samfélaginu spiluðu inn í ákvörðun hennar en eins og fram hefur komið greindust hátt í 1.600 smit hér á landi í gær. Eiginmaður Ingu er með undirliggjandi sjúkdóm og má illa við því að fá Covid-19. Inga kvaðst hafa boðið öðrum þingmönnum flokksins að mæta í hennar stað en afstaða þeirra hafi verið sú sama.
Þórdís sagði í upphafi þáttarins í dag að henni þætti leitt að Inga hefði ekki séð sér fært að mæta. Það væri skemmtilegra að hafa hana með. Þórdís sagðist þó skilja það að fólk tæki ákvarðanir út frá sínum forsendum.
