Inga hneyksluð: Stjórn­völd vilja frekar mat í minka en fólk

„Ríkis­stjórnin er sátt og til­búin að ausa fjár­munum borgaranna í fóður fyrir minka á sama tíma og fá­tækir sam­landar þeirra mega éta það sem úti frýs,“ segir Inga Sæ­land, for­maður Flokks fólksins og 2. Vara­for­maður fjár­laga­nefndar Al­þingis, í að­sendri grein sinni í Morgun­blaðinu í dag.

Í grein sinni gagn­rýnir Inga for­gangs­röðun ríkis­stjórnarinnar á tímum CO­VID-19. Hún hefur á­hyggjur af þeim Ís­lendingum sem upp­lifa nú kvíða og van­líðan í að­draganda jóla enda hefur far­aldurinn haft mikil á­hrif á á heims­byggðina.

Hún bendir á að ekki sé æski­legt að fjöl­skyldur komi saman um jólin af hættu við út­breiðslu far­aldursins.

„Við getum lítið gert úr því sem komið er varðandi fjöl­skyldu­sam­komur um jólin. Enda hafa stjórn­völd á­kveðið að hafa þetta svona. Um leið telja þau okkur trú um að við þurfum að læra að lifa með veiru sem aldrei hefði þurft að ríða hér röftum sem raun ber vitni. Það hafa dæmin sýnt og sannað þar sem milljóna­þjóðir þurfa ekki að leggja slíkar kvaðir á sam­fé­lags­þegna sína sem ís­lensk stjórn­völd hafa kosið að gera. Nær­tækast er að benda á Nýja-Sjá­land og Taí­van í þeim efnum.“

Inga bendir á að fimmti fjár­auki sé nú inni á borðum fjár­laga­nefndar, meiri­hluti út­gjalda tengdur CO­VID-málum eins og það er nefnt.

„En hvað með fá­tæka eldri borgara sem hafa ekkert annað en strípaðar al­manna­trygginga­bætur? Fá þeir ein­hverja náð fyrir augum stjórn­valda? Svarið er ein­falt NEI. Það á ekkert að gera fyrir gamla fólkið sem á ekki fyrir salti í grautinn. Það má á­fram hokra í van­líðan og fá­tækt án að­stoðar ríkis­stjórnar Katrínar Jakobs­dóttur.“

Inga vill í þessu sam­hengi benda á hróp­legt ó­rétt­læti og mis­munun og nefnir hún dæmi af því hvernig tals­verðum fjár­munum var varið í að koma minka­bændum til að­stoðar hér á landi.

„Dæmi hver sem vill og segi jafn­vel að ég sé að etja saman hinu og þessu. Mér gæti ekki verið meira sama. Í sumar sem leið voru 80 milljónir auð­sóttar í ríkis­sjóð fyrir mat handa minkum sem rækt­endur sögðust ekki hafa efni á að fóðra. Rökin voru þau að verið væri að glíma tíma­bundið við Co­vid-far­aldurinn. Hver var þá skýringin á því að í desember 2019 varð ekkert af fyrir­huguðu upp­boði á skinnum í Dan­mörku og það fyrir Co­vid? Jú, það var ein­fald­lega ekki næg eftir­spurn eftir skinnum dýranna.“

Inga segir að um sé að ræða at­vinnu­grein sem er ó­sjálf­bært dýra­níð.

„Margar þjóðir eru á móti þessari verk­smiðju­fram­leiðslu og þeim við­bjóði sem dýrin mega þola. En ríkis­stjórnin er sátt og til­búin að ausa fjár­munum borgaranna í fóður fyrir minka á sama tíma og fá­tækir sam­landar þeirra mega éta það sem úti frýs. Flokkur fólksins segir: Fólkið fyrst, svo allt hitt.“