Inga birtir árs­gamalt mynd­band: „Þetta var sem sagt fyrir CO­VID og allir frjálsir innan lands“

„Þetta var sem sagt fyrir Co­vid og allir frjálsir innan lands. Árs­há­tíðir og gleði út um allt land. Nú hins vegar er öldin svo sannar­lega önnur þrátt fyrir að þurfa alls ekki að vera það,“ segir Inga Sæ­land, for­maður Flokks fólksins, á Face­book-síðu sinni.

Þar birtir hún mynd­band sem hún tók fyrir nær sléttu ári, en þann 2. febrúar 2020 var hún á leið frá Siglu­firði til Akur­eyrar. Í mynd­bandinu hefur hún orð á því að 50-60 manna hópar hefðu verið á göngu­skíðum á Siglu­firði helgina áður. Ekki benti margt til þess á þeim tíma­punkti að CO­VID-19-far­aldurinn myndi draga á þriðju milljón ein­stak­linga til bana á innan við ári.

„Co­vid hefði aldrei þurft að stjórna lífi okkar hér innan­lands sem raun ber vitni. Með því að hafa strax gripið til þess ráðs að fara þá leið sem Ný-Sjá­lendingar hefa fylgt þá værum við frjáls hér heima. Engar lokanir, engar grímur eða ná­lægðar­reglur. Tveggja vikna sótt­kví í sótt­varnar­húsi eftir komuna til landsins hefði tryggt okkur allt það.“

Inga segist í færslu sinni velta fyrir sér sam­fé­lags­legum og fjár­hags­legum á­bata af þessum þremur bylgjum plágunnar. Kveðst hún bíða spennt eftir sviðs­myndum ríkis­stjórnarinnar varðandi það.

„Skásta úr­ræðinu til þessa er nú beitt á landa­mærunum en þrátt fyrir það með ein­beittum vilja hunsa ein­hverjir reglurnar sem þeir eiga að fylgja við komuna til landsins.

Ég velti fyrir mér af hverju þjóðin hefur ekki verið spurð að því hvort hún vilji veiru­frítt frelsi innan­lands eða bælandi að­gerðirnar sem notast hefur verið við til þessa.“