Inga Sæland og flokkur hennar. Flokkur fólksins, næði ekki manni á þing í næstu Alþingiskosningum ef marka má nýjan Þjóðarpúls Gallup.
Niðurstaða könnunarinnar hlýtur að teljast áfall fyrir flokkinn en þar sögðust einungis 4,1 prósent svarenda ætla að ljá flokknum atkvæði sitt. Fimm prósenta fylgi þarf á landsvísu til að ná inn á þing.
Flokkur fólksins bauð fyrst fram í Alþingiskosningunum árið 2016 eftir að hann var stofnaður 29. apríl sama ár. Í kosningunum í október árið eftir fékk flokkurinn fjóra þingmenn. Nú eru þingmenn hans einungis tveir, Inga Sæland formaður og Guðmundur Ingi Kristinsson þingflokksformaður.
Samkvæmt Þjóðarpúlsinum eru Sósíalistar í sókn og bæta við sig einu prósentustigi, 6,7 prósent svarenda sögðust styðja þá. Fylgi annarra flokka breyttist lítið milli mánaða og nýtur Sjálfstæðisflokkurinn mest fylgis, eða 24,5 prósenta.
Þá sögðust 58 prósent svarenda styðja núverandi ríkisstjórn.
Niðurstöðurnar eru úr netkönnun sem Gallup gerði dagana 29. júlí til 15. ágúst. Heildarúrtaksstærð var 6.238 og þátttökuhlutfall var 48,9 prósent. Vikmörk á fylgi við flokka eru á bilinu 0,8-1,7 prósent. Einstaklingar í úrtaki voru valdir af handahófi úr Viðhorfahópi Gallup.
