Illugi Jökulsson, rithöfundur og samfélagsrýnir, telur að það geti reynst heillaskref ef VG fer í samstarf með Framsóknarflokki og Samfylkingu, með stuðningi Pírata.
Þórhildur Sunna Ævarsdóttir, þingmaður Pírata, sagði í Silfrinu á RÚV í morgun að Píratar myndu styðja slíkt samstarf. Margt bendir til þess að Sjálfstæðisflokkur, Framsóknarflokkur og VG haldi ríkisstjórnarsamstarfi sínu áfram en aðrir kostir eru svo sannarlega á borðinu.
Samfylkingin, VG og Framsókn fengu samtals 27 þingmenn í nýafstöðum kosningum en með stuðningi Pírata yrðu 33 þingmenn á bak við ríkisstjórnina, eða þriggja manna meirihluti.
Illugi segir í pistli á Facebook-síðu sinni að það sé ljóst að til að halda áfram í ríkisstjórn með Sjálfstæðisflokki og Framsóknarflokki þá þurfi VG að fórna annað hvort heilbrigðisráðuneytinu eða umhverfisráðuneytinu.
„Það er mjög vafasamt að flokkurinn lifi það hreinlega af, sér í lagi þegar dregur að næstu kosningum. Þetta væri hins vegar leið til þess að flokkurinn gæti haldið þeim ráðuneytum báðum,“ segir Illugi.
Hann segir að mögulega þurfi VG að gefa Framsóknarflokknum eftir forsætisráðuneytið en Katrín Jakobsdóttir væri fullsæmd af því að vera utanríkisráðherra. Segir Illugi að hún gæti reyndar unnið þar öflugra starf en títt er um íslenska utanríkisráðherra.
„Ég mundi reyndar helst vilja hafa Pírata með í svona stjórn. Þeir eru heiðarlegir og réttsýnir,“ segir Illugi að lokum.
