Jón Viðar Jónsson leikhúsgagnrýnandi tekur undir með Kjartani Magnússyni borgarfulltrúa um að Dagur B. Eggertsson, borgarstjóri sé í „hefndarleiðangri.“
Kjartan sagði slíkt í viðtali á Vísi en þar leggst hann gegn fyrirhugaðri lokun Borgarskjalasafns og segir vinnu Dags að baki tillögunni óvandaða.
„Mikið rétt, Kjartan, þetta lyktar því miður ekki meir af öðru en hefnigirni. Auk þess að vera dæmi um fádæma heimsku og fullkomið skilningsleysi á því menningarhlutverki sem Reykjavíkurborg hefur gegnt, oft með sóma, á aðra öld. Ég tek raunar eftir því að ýmsir FB-vinir mínir, sem eru annað hvort félagar eða nákomnir Samfylkingunni í anda og ófeilnir við að tjá sig hátt og skýrt hvenær sem "Íhaldið" á í hlut, að þeir eru nú undarlega hljóðlátir,“ skrifar Jón á Facebook.
„Ég hef td ekki orðið þess var að Samfylkingarmaðurinn Guðmundur Andri Thorsson sem eins og ég og fleiri bera íslenska menningu fyrir brjósti, hafi tjáð sig um þetta. Ekki heldur Illugi Jökulsson. Hafi þeir gert það án þess að ég hafi orðið var, bið ég þá forláts og þá um leið að sýna mér þær greinar/færslur sem þeir kunna að hafa birt um þetta. Annars væri vitaskuld fróðlegt að heyra hvað þeir og ýmsir aðrir félagar þeirra hafa um þessa ósvinnu að segja,“ segir Jón að lokum.
Margir hafa tekið undir með Jóni og segir Kristján Frímann Kristjánsson meðal annars að hann sé sammála. „Þetta lyktar allt illa,“ segir Kristján.
Illugi Jökulsson er hins vegar ekki sáttur með að vera bendlaður í færslunni. „Afsakaðu, en af hverju ertu að nefna mig hér til sögunnar í einhverjum spælingartóni?“ spyr Illugi en svör höfðu ekki borist þegar þetta er ritað.
