Illugi Jökulsson rifjar upp landsleiki Íslands og Eistlands þann 24. apríl 1996, í aðdraganda landsleikja Íslands við Armeníu og Liechtenstein. Í hóp fyrir landsleikina eru tveir synir Eiðs Smára Guðjohnsen og skorar Illugi á KSÍ að hinum 43 ára gamla Eið verði skipt inn á völlinn og leiki nokkrar mínútur með sonum sínum.
„Þann 24. apríl 1996 voru þeir Arnór Guðjohnsen og Eiður Smári í dauðafæri á að verða fyrstu feðgarnir til að spila saman landsleik í fótbolta. Þá var Ísland að fara að keppa á útivelli við Eistland. Hjá KSÍ voru menn hins vegar svo púkalegir að skipa landsliðsþjálfaranum Loga Ólafssyni að tefla þeim ekki fram saman (Aha, formaður KSÍ að hafa afskipti af vali landsliðsins!!),“ skrifar Illugi.
„Núna hafa tveir synir Eiðs verið valdir í landsliðið gegn Armeníu og Liechtenstein, þeir Andri Lucas og Sveinn Aron. Þá er spurningin hvort KSÍ geti ekki bætt fyrir skammsýni Eggerts með því að tefla Eiði fram ásamt strákunum sínum í fremstu víglínu, amk í leiknum gegn Liechtenstein. Hann er náttúrlega ekki í leikæfingu og orðinn 43 ára gamall, en gæti nú alveg enst hálftíma eða svo gegn ekki sterkara liði en frá furstadæminu í Ölpunum.
Ha, væri það ekki alveg kjörið?“
