Illugi Jökulsson, fjölmiðlamaður og rithöfundur, er ekki mikill aðdáandi Sjálfstæðisflokksins ef marka má færslu hans á Facebook í dag. Þar rifjar hann upp ýmis mál sem tengjast Sjálfstæðlokknum og þakkar Katrínu Jakobsdóttur og Svandísi Svavarsdóttur fyrir að hafa haldið flokknum við völd eftir kosningar.
Eins og greint var frá í gær þáði Áslaug Arna Sigurbjörnsdóttir dómsmálaráðherra þyrluflug með Landhelgisgæslunni. Áslaug játaði svo í dag að það hefðu verið mistök að þiggja ferðina þó Landhelgisgæslan hefði sent tilkynningu þess efnis að enginn aukakostnaður eða fyrirhöfn hafi hlotist af skutlinu.
Illugi deilir frétt Stundarinnar frá því í morgun þar sem birt voru viðbrögð Rósu Bjarkar Brynjólfsdóttur, þingmanns VG, vegna þyrluferðarinnar. Í færslunni segir hann:
„Þetta er Sjálfstæðisflokkurinn, gjörið svo vel! Það hvarflaði ekki að Bjarna Benediktssyni að það væri neitt rangt við reikninga hans á Seychelles-eyjum. Það hvarflaði ekki að Kristjáni Þór Júlíussyni að það væri neitt rangt við að hringja í vin og spyrja áhyggjufullur hvernig honum liði eftir að sannfærandi ásakanir birtust um stórfelldar mútugreiðslur vinarins. Það hvarflaði ekki að Sigríði Andersen að það væri neitt rangt við að makka með dómarastöður eins og henni og félögum þóknaðist. Það hvarflaði ekki að Þórdísi Kolbrúnu að skemmta sér með vinkonum sínum tveim dögum eftir að hún sjálf skrifaði grein í blað þar sem hún hvatti til varúðar. Það hvarflaði ekki að Áslaugu Örnu að það væri neitt rangt við að hún fengi björgunarþyrlu Landhelgisgæslunnar til sendiferða.“
Illugi endar færsluna svo á kaldhæðnislegum kveðjum til forystumanna VG:
„Takk kærlega, Katrín og Svandís, fyrir að hafa haldið þessum spillta forréttindaflokki við völd eftir kosningarnar síðustu. TAKK!“
