Illugi Jökulsson, fjölmiðlamaður og samfélagsrýnir, segir að það hafi verið mikil blessun að ekki var hlusta á ákveðna alþingismenn og lýtalækna sem vildu fara aðrar leiðir í baráttunni gegn COVID-19.
Illugi bendir á að í Bandaríkjunum og í mörgum Evrópuríkjum leiki COVID-19 nú lausum hala sem aldrei fyrr, jafnvel í ríkjum sem eru þekkt fyrir gætni og nefnir hann Þýskaland í því samhengi. Á sama tíma virðist veiran vera á undanhaldi hér á landi og er það ekki síst markvissum aðgerðum sóttvarnayfirvalda að þakka.
Í gær var greint frá því að fimm hefðu smitast af veirunni undanfarinn sólarhring, en samkvæmt tölum COVID.is í morgun voru einungis 129 virk smit hér á landi í gær. Hefur 14 daga nýgengi smita farið hratt niður á við undanfarna daga.
Illugi segir að niðurstaðan hljóti að vera sú að þrátt fyrir allt hafi íslenskum sóttvarnaryfirvöldum tekist aðdáunarlega vel upp í vörn sinni gegn pestinni.
„Og mikil guðs blessun að ekki hafi verið hlustað á lýtalækna og alþingismenn sem vildu fara aðrar leiðir,“ segir hann og á þar við Sigríði Andersen og Brynjar Níelsson.
Margir taka undir með Illuga en Þór Saari, fyrrverandi þingmaður, bendir á að enn séum við með heilbrigðisráðherra sem fer ekki eftir tilmælum sóttvarnarlæknis um sóttvarnir á landamærunum þrátt fyrir að faraldurinn fari vaxandi í nágrannalöndum okkar.
„Það verður líklega mikið um aukavaktir vegna Kóvid hjá heilbrigðisstarfsfólki um jólin, áramótin og fram eftir janúar vegna þess.“
