Stöð 2 tilkynnir með stolti að leitin að næstu Idol stjörnu Íslands er hafin. Þetta kemur fram í tilkynningu.
Idol þættirnir hafa verið sýndir út um allan heim síðustu tuttugu ár við gríðarlegar vinsældir og margar af skærustu stjörnum tónlistarheimsins hafa stigið sín fyrstu skref þar.
Þórhallur Gunnarsson, dagskrárstjóri Stöðvar 2, segir tíma þáttarins alls ekki liðinn í samtali við Fréttablaðið.
„Nei, alls ekki. Við erum bara hrikalega spennt. Við höfum líka fengið viðbrögð við þessu.“
Stöð 2 segist hvetja alla áhugasama á aldrinum 16 til 30 ára að senda inn myndband með söngprufu. Idol lestin mun einnig verða á ferðinni í leit að hæfileikafólki um landið í sumar. Nánari dagsetningar verða auglýstar síðar.
Dómnefndin verður skipuð nokkrum af skærustu stjörnum íslenskrar tónlistar í dag og við kynnum þau til leiks á næstu dögum. Tónlistarstjórn þáttanna verður í höndum Magnúsar Jóhanns Ragnarssonar sem stýrir einnig hljómsveit þáttanna.
