Óhætt er að segja að íbúð ein sem er til sölu í miðborg Reykjavíkur hafi vakið athygli á samfélagsmiðlum, en um er að ræða íbúð í húsi við Bárugötu 4 sem er til sölu hjá Miðbæ fasteignasölu.
Alls eru þrjár íbúðir í húsinu sem selst í heilu lagi. Húsið er býsna fallegt, byggt 1925 og hafa eigendur reynt að halda húsinu sem næst upprunalegri mynd.
Í einni af íbúðum hússins virðist einhver ævintýramaður búa ef marka má myndir úr íbúðinni. Að minnsta kosti einn uppstoppaður ísbjörn er í íbúðinni og þá má sjá ísbjarnarskinn á gólfinu. Haus af vísundi hangir uppi á vegg og þá vekur athygli að jólatré hangir niður úr loftinu – á hvolfi. Fleiri uppstoppuð dýr eru í íbúðinni, þar á meðal refur.
Athygli var vakin á íbúðinni á Twitter og í einum þræði á samfélagsmiðlinum vinsæla segir ein ágæt kona einfaldlega: „Þarna býr kall“
Myndir má sjá hér að neðan:
