Íbúar í Vesturbænum segjast sumir hverjir heyra dularfull hljóð á næturnar. Í síðustu viku var töluvert fjallað um hljóð sem heyrðist á Akureyri sem gerði íbúum þar lífið leitt.
Í Facebook-hópi Vesturbæinga segist einn hafa heyrt hljóðið, mögulega það sama eða að minnsta kosti sambærilegt og á Akureyri, nokkrum sinnum. Segir sá sem byrjar umræðuna að hljóðið virðist koma frá höfninni og bætir við að það hafi haldið fyrir henni vöku.
Þó nokkrar athugasemdir hafa verið skrifaðar við færsluna og taka margir undir að þeir hafi heyrt umrætt hljóð. „Ég hef heyrt þetta líka,“ segir einn á meðan annar bætir við: „Hef heyrt þetta líka.“ Þriðji bætir við: „Já, heyri drunur líka um nætur. Kemur í átt frá höfninni.“
Enginn virðist vera með svör á reiðum höndum um uppruna hljóðsins en grunur leikur á að hljóðið sem gerði íbúum á Akureyri lífið leitt hafi komið frá mastri skútu sem lá við Akureyrarhöfn. Sérfræðingur heilbrigðiseftirlits Norðurlands eystra sagðist að minnsta kosti sannfærður um það í samtali við Morgunblaðið.
Þannig hafi hann tvisvar farið í eftirlitsferð að skútunni og í bæði skiptin hafi hann heyrt hljóðið.
