Íbúar í Hvassaleitinu vakna ekki við fagra sjón í morgun eftir að 800 millimetra kaldavatnslögn fór í sundur um tíuleytið í gærkvöldi. Vatn flæddi inn í hús, kjallara, bílskúra og bíla í Hvassaleitinu í nótt
„Þetta er náttúrulega rosalegt tjón,“ segir Svava Grétarsdóttir íbúi í Hvassaleiti í samtali við Fréttablaðið.
„Upptökin eru við hliðina á blokkinni okkar þannig það flæddi mjög mikið. Ég held það hafi verið hæðst um 1,20 m sem að flæddi inn á jarðhæðina. Það eru geymslur, það eru aukaherbergi sem allir eiga og svo eru þvottahúsin þau eru alveg ónýt,“ bætir Svava við.
Starfsmönnum Veitna tókst að skrúfa fyrir lögnina um ellefu í gær og tóku þeir við af slökkviliðinu um miðnætti.
„Við sluppum að öðru leyti ágætlega. Svo veit maður ekki hvernig fór með bílana sem lentu illa í þessu við Kringluna,“ segir Svava en bílastæðið við blokkina hennar slapp.
„Bílastæðið okkar er fyrir ofan blokk en þetta gerist við hliðina á blokkinni og lekur niður. En það var bara stöðuvatn. Ég hefði getað verið á kajak í bakgarðinum í gær. Þetta var það skrýtnasta sem ég hef séð,“ segir Svava.
Spurð um hvernig staðan er núna segir Svava að það séu þurrkar um allt að reyna tæma vatnið og að starfsmenn Veitna höfðu verið að í alla nótt.
„Það voru mikil læti til þrjú í nótt og svo hægt að leggja sig aðeins. Fyrst og fremst eru þetta hlutir sem eru að skemmast þetta er ekki það dramatískt tjón. Þetta hefði verið verra ef það hefðu verið íbúðir á neðstu hæðinni, segir Svava.
„Það er fyrst og fremst það sem skiptir máli í þessu að þetta hafi ekki verið íbúðarhúsnæði frá fólki sem var að skemmast,“ segir Svava að lokum.
