„Við viljum ítreka við íbúa Fjallabyggðar að huga að verðmætum sínum og geyma slíka hluti ekki fyrir allra augum. Ennfremur að læsa húsum sínum og geymslum vegna ítrekaðra þjófnaða og innbrota á svæðinu.“
Þetta segir í tilkynningu frá Lögreglunni á Norðurlandi eystra nú í morgunsárið. Eins og greint var frá í gær rápaði maður með skíðagrímu fyrir andlitinu á milli húsa á Siglufirði í fyrrinótt þar sem hann gerði húseigendum bylt við ásamt því að hafa verðmæti á brott með sér.
Sigurbjörn Þorgeirsson, lögreglumaður í Fjallabyggð, sagði í samtali við Trölla að íbúar bæjarins þyrftu nú að horfa fram á nýjan raunveruleika þar sem ekki væri lengur óhætt að hafa hús sín ólæst. Ekki var um að ræða innbrot þar sem húsin voru ólæst og flokkast það því sem húsbrot.
Manninum var lýst sem lágvöxnum og dökkklæddum með dökka hettu sem huldi andlit sitt að mestu.
„Málin eru í vinnslu og vonandi tekst okkur að upplýsa þessa þjófnaði en kæru íbúar Fjallabyggðar, verið á varðbergi. Þetta gildir auðvitað fyrir alla okkar lesendur, að huga að verðmætum, læsa húsum þegar farið er af bæ. Með bestu kveðju og eins og fyrr, erum við öll ALMANNAVARNIR,“ segir í tilkynningu lögreglunnar.
Sæl öll. Við viljum ítreka við íbúa Fjallabyggðar að huga að verðmætum sínum og geyma slíka hluti ekki fyrir allra...
Posted by Lögreglan á Norðurlandi eystra on Miðvikudagur, 7. október 2020
