Íbúar á einkareknum hjúkrunarheimilum sem rekin eru í hagnaðarskyni eru líklegri til að deyja af völdum COVID-19 en íbúar hjúkrunarheimila sem ekki eru rekin í hagnaðarskyni eða eru ríkisrekin. Þetta er að minnsta kosti raunin í Ontario, fjölmennasta fylki Kanada.
Toronto Star greinir frá þessu en blaðið skoðaði sérstaklega dánartíðni á hjúkrunarheimilum fylkisins. Tæplega 20 þúsund tilfelli veirunnar hafa greinst í Ontario og dauðsföll eru 1.540 samkvæmt nýjustu tölum.
Í umfjöllun blaðsins kemur fram að COVID-19 faraldurinn hafi látið talsvert að sér kveða á hjúkrunarheimilum í Ontario, skiptir þá engu hvort um einkarekin eða opinber hjúkrunarheimili er um að ræða – hlutfallið er svipað.
En þegar kemur að dánartíðni vekur athygli að hún er allt að fjórum sinnum hærri á hjúkrunarheimilunum sem rekin eru í hagnaðarskyni í samanburði við þau sem ekki eru rekin í hagnaðarskyni. Og allt að tvsivar sinnum hærri en á hjúkrunarheimilum sem eru ríkisrekin.
Toronto Star ræðir þetta við Sharleen Stewart, forseta SEIU Healthcare-stéttarfélagsins, en tölurnar koma henni lítið á óvart. Margir heilbrigðisstarfsmenn eru í félaginu, þar á meðal starfsmenn opinberra hjúkrunarheimila og einkarekinna.
Hún segir að reynsla félagsmanna sé sú að hjúkrunarheimili sem rekin eru í hagnaðarskyni búi ekki yfir jafn góðri þjónustu og önnur heimili. Þannig sé færra starfsfólk á þessum heimilum og hlutastarfsmenn séu margir. Þá séu fleiri ófaglærðir starfsmenn í vinnu á umræddum heimilum.
