Þátturinn Lífið er lag er á dagskrá Hringbrautar kl. 20.30 en þættirnir fjalla um stöðu, hagsmuni og framtíðarsýn eldri borgara á Íslandi en þetta er 5. þáttur af 12 á þessu hausti.
Efni þáttanna er mjög blandað en þar er fyrst og fremst upplýsandi efni um heilsu, lífsstíl, heilbrigði, matarvenjur og ýmis hagsmunamál eldri borgara.
Undir lok hvers þáttar ræðir þáttastjórnandinn Sigurður K. Kolbeinsson við þekkta Íslendinga sem vakið hafa athygli á árum áður fyrir störf sín og árangur eða framlag til þjóðarinnar.
Í síðustu viku var rætt við Ingibjörgu Pálmadóttur en í kvöld er Ágúst Guðmundsson leikstjóri í stuttu viðtali. Hann mun segja frá fyrsta alvöru kvikmyndaverki sem hann stjórnaði árið 1980 en það var stórmyndin Land og synir.
Þúsundir Íslendinga sáu þessa kvikmynd og flesta rak í rogastans þegar Sigurður Sigurjónsson beindi haglabyssu að hvítum fallegum hesti sem felldur var í bíómyndinni. En var hann felldur í raun? Því svarar Ágúst Guðmundsson í þætti kvöldsins. Kvikmyndataka var í höndum Friðþjófs Helgasonar.
