„Ég vil aðallega vekja athygli á lausagöngu hunda, þetta er skelfilegt. Ég get ekki sent barnið mitt út að labba,“ segir Helga Kristín Guðmundsdóttir, móðir 11 ára stúlku, sem var bitin til blóðs af Labrador-hundi í Grindavík í vikunni.
Lögreglan á Suðurnesjum sagði frá því í skeyti til fjölmiðla í morgun að stúlkan hafi verið á gangi með hund fjölskyldu sinnar þegar laus hundur kom aftan að henni og beit hana í hönd og læri. Í skeyti lögreglu kom fram að lögregla hafi rætt við eiganda hundsins og látið Matvælastofnun og Heilbrigðiseftirlitið vita af málinu.
Helga segir að umræddur hundur hafi verið laus í garði sem dóttir hennar gekk fram hjá síðastliðinn miðvikudag. Hljóp hann aftan að dóttur Helgu, þefaði af afturendanum á hundinum sem hún var með í taumi og réðst svo á stúlkuna.
Helga segir að dóttir hennar hafi verið með talsverða áverka á annarri höndinni þar sem hundurinn beit hana til blóðs. Þá beit hann hana í lærið en komst ekki í gegnum buxurnar. Dóttir hennar er þó aum og marin á lærinu.
Helga segist ekki vilja ræða viðbrögð eigenda Labrador-hundsins sérstaklega eða dæma þá. Það sem hún vill þó vekja athygli á það er lausaganga hunda.
„Hundurinn var laus inni í garði og eigandinn var ekki hjá honum. Ég kom að barninu mínu þarna á harðahlaupum og ég sé ekkert nema blóð á höndunum á henni. Það vildi þannig til að hundurinn okkar náði að losa sig til þess að fara í hinn hundinn þegar hann er búinn að bíta hana tvisvar,“ segir Helga og bætir við að ekkert hafi amað að hundinum hennar.
Helga hefur verið hundaeigandi alla sína ævi og segist hún hafa orðið vör við kæruleysi margra hundaeiganda í gegnum tíðina. Hvetur hún hundaeigendur til þess að tryggja að hundarnir séu ekki lausir eins og lög og reglur gera ráð fyrir.
Helga segir að dóttur hennar sé brugðið eftir atvikið og hún þori ekki að fara út ein. „Hún fer á fótboltaæfingu en ég verð að ná í hana því hún þorir ekki að labba heim. Það þykir mér eiginlega verst, það eru þessi áhrif á sálina.“
Helga segir að þó að hundurinn hennar sé blíður og góður þá sé honum ekki hleypt einum út.
„Hundarnir eru á okkar ábyrgð, ég veit það að ef hundurinn minn myndi gera þetta einu sinni þá gerir hann þetta aftur. Ég ætla heldur ekki að koma honum í þá aðstöðu að bregðast svona við.“
