Hugleikur Dagsson einn færasti grínisti okkar Íslendinga heldur sína fyrstu uppistandssýningu á íslensku í langan tíma á Húrra í kvöld.
Hann mætti í morgunþáttinn Ísland vaknar í morgun og sagði það væri rosalega skrýtið að fara flytja efni á íslensku sem hann væri búin að flytja áður á ensku. „Auðvitað veit ég hvernig ég á að segja þessa hluti á íslensku en ég er í alvöru með svona kvíða um að ég muni gleyma hvernig sumt er sagt á íslensku,“ segir Hugleikur á K100.
„Það er hluti af því að gera svona grín. Þú ert alltaf að hætta á félagslegt sjálfsmorð. Vegna þess að það að fara á svið og vera fyndinn er rosalega gaman og ein að skemmtilegustu tilfinningum í heimi en að fara á svið og verða ekki fyndinn – þá ertu að upplifa mannlega eymd í sinni hreinustu mynd,“ sagði Hugleikur en orð hans glæddu þáttastjórnendur sem hlógu hátt. Sem betur fer, gengi allt vel í 98% tilvika bætti Hugleikur þó við.
Hann segist spyrja sjálfan sig i hvert skipti „af hverju í andskotanum er ég að þessu“ áður en hann fer á svið.
Hægt er að hlusta viðtalið hér.
