Hlaðvarpsþáttastjórnandinn Hugi Halldórsson kastar út önglinum á samfélagsmiðlinum Twitter, þar sem hann kannar stemninguna fyrir sérstökum hlaðvarpsþætti um 70 mínútur.
Þættirnir voru þeir langvinsælustu í íslensku sjónvarpi þar sem þeir voru sýndir á sjónvarpsstöðinni PoppTíví árin 2000 til 2007.
Dagskrárliðarnir hafa fyrir löngu öðlast mikla frægð og mætti þar helst nefna ógeðisdrykkinn, falda myndavél og fríkað úti eins og uppátæki þeirra Sveppa, Audda, Simma, Jóa, Huga og Péturs Jóhanns í útlöndum voru kölluð.
„Er rauðvínið mitt svona gott eða er stemmning fyrir 70min special podcasti ? #whythehellnot“ skrifar Hugi í gærkvöldi og fær miklar undirtektir. Rúmlega áttatíu manns hafa brugðist við færslunni, sem telst mikið á Twitter mælikvarða.
Hugi ætti ekki að eiga erfitt með skipulagninguna en sjálfur stýrir hann fótboltahlaðvarpsþættinum FantasyGandalf. Þá stýrir Auðunn Blöndal vinsælasta útvarpsþætti landsins, FM95Blö, svo þeim félagar ætti að reynast verkið létt í hendi.
Hér að neðan má horfa á nokkrar vel valdar klippur úr þáttunum sem hlaðið hefur verið upp á YouTube:
Er rauðvínið mitt svona gott eða er stemmning fyrir 70min special podcasti ? #whythehellnot
— Hugi Halldórsson (@hugihall) February 19, 2021
