„Við höfum rætt þetta við lögfræðinga og erum mjög hrædd um að þetta muni lenda á okkur,“ segir Andrej Holbicka í samtali við Fréttablaðið í dag.
Andrej er eigandi parhúss að Skólagerði 49 á Kársnesi í Kópavogi en Fréttablaðið greindi frá því í gær að húsið við hliðina á væri komið á sölu. Það sem vakti einna mesta athygli var sölulýsing hússins en þar kom fram að skoða þyrfti eignina með fagaðilum í viðeigandi klæðnaði af heilsufarsástæðum.
Eignin er mjög illa farin sökum rakaskemmda og myglu og þarfnast algjörar endurnýjunar að innan sem utan. Ljóst er að það mun kosta tugmilljónir króna að koma húsinu í toppstand. Seljandi er dánarbú sem eignaðist húsið í skuldaskilum, að því er segir í frétt Fréttablaðsins.
Andrej er sem fyrr segir eigandi Skólagerðis 49 og hafa hann og hans fjölskylda sinnt sínum hluta vel eins og meðfylgjandi mynd ber með sér. Andrej óttast að þurfa að taka þátt í kostnaðinum þegar nýr eigandi fer í endurbætur.
Andrej segir að íslensk lög séu frábrugðin lögum úti í Evrópu og hann hafi ekki haft hugmynd um að þurfa að taka þátt í hugsanlegum kostnaði vegna framkvæmda þegar hann keypti húsið. Gamli eigandinn hafi ekki sinnt neinu viðhaldi undanfarin 40 ár eða svo.
Andrej gagnrýnir meðal annars Kópavogsbæ fyrir að sýna málinu lítinn áhuga en ekkert verið gert. „Þetta er bara búin að vera skelfileg staða,“ segir hann. Hann óttast að nýr eigandi muni einn daginn banka upp á og rukka þau fyrir viðgerðarkostnað hússins. „Það gæti gerst. Og yrði mjög ósanngjarnt,“ segir hann við Fréttablaðið.
