Hryðju­verka­málið í upp­námi eftir úr­skurð héraðs­dóms: „Þetta er lær­dómur fyrir lög­reglu og á­kæru­valdið“

Héraðs­dómur Reykja­víkur hefur vísað frá báðum köflum er lúta að hryðju­verkum í hryðju­verka­málinu svo­kallaða. Þetta kemur fram í frétt Vísis.

Dómari á­kvað að vísa öllu frá sem lítur að hryðju­verkum, til­raun til hryðju­verka og hlut­deild í til­raun til hryðju­verka frá dóminum.

Tveir menn eru á­kærðir í málinu, Sindri Snær Birgis­son og Ísi­dór Nat­hans­son.

Sveinn Andri Sveins­son, verjandi Sindra Snæs, segir í sam­tali við Vísi að hann sé á­nægður með niður­stöðuna sem er í sam­ræmi við væntingar þeirra.

„Á­kæru­valdið getur auð­vitað kært þetta til Lands­réttar, þeir gætu líka á­kveðið að gefa út nýja á­kæru sem lýtur að þessu. Svo gætu þeir bara á­kveðið að láta kyrrt liggja og klára þá bara vopna­laga­brotin, sem eru auð­vitað minni­háttar­brot í saman­burði við hryðju­verka­brotin.“

„Ég held að það megi líta á þetta já­kvætt, að þetta sé lær­dómur. Þetta er lær­dómur fyrir lög­reglu og á­kæru­valdið. Þeir geta horft að­eins inn á við og metið það hvernig þeir geta bætt sín vinnu­brögð ef og þegar svipuð að­staða kæmi upp. Fara þá ró­lega af stað, fylgjast með hugsan­legum brota­mönnum í ein­hvern tíma og rann­saka þá á­fram,“ segir Sveinn Andri.

Hann segir lög­regluna hafa verið of bráð­láta.