Fyrirtækið Hrím Hönnunarhús hefur fengið mikla gagnrýni í Facebook-hópnum Markaðsnördar eftir að skjáskoti af Facebook-færslu fyrirtækisins í gær var dreift á samfélagsmiðlum. Eigandi Hríms segir að um mannleg mistök hafi verið að ræða.
Í færslunni birtist mynd af björgunarbáti á Þingvallavatni þar sem umfangsmiklar aðgerðir stóðu yfir vegna flugslyssins síðastliðinn fimmtudag. Eins og kunnugt er voru fjórir voru um borð í lítilli flugvél sem brotlenti í vatninu og létust allir sem um borð voru. Björgunarsveitir og fleiri viðbragðsaðilar unnu þrekvirki við leitina að vélinni en um var að ræða eina stærstu aðgerð björgunarsveita hin síðari ár hér á landi.
Í færslu Hríms, sem nú hefur verið eytt, stóð orðrétt:
„Vonum að leitin fari að skila árangri og nóttin fari vel hjá öllum. Takk elsku björgunarsveitir landsins fyrir að vera naglar. Takk fyrir fallega mynd af Regnpokanum okkar.“
Það var þessi síðasta setning sem vakti reiði margra og spurði málshefjandi í Markaðsnördum hvort fólki þætti þetta ekki frekar ósmekklegt. Hér að neðan má sjá nokkur svör:
„Mjög!“
„Frekar ósmekklegt“
„Hvorki tími né staður“
„Já, nei, þetta er ekki viðeigandi“
„Þetta er sorgleg auglýsing“
Hefur fyrirtækið verið sakað um að notfæra sér þennan mikla harmleik til að auglýsa vöru sína. Tinna Brá Baldvinsdóttir, eigandi Hríms, blandaði sér sjálf í umræðuna í gærkvöldi og sagði hún að um mannleg mistök hafi verið að ræða.
„Fengum þessa mynd senda í morgun frá björgunarsveitinni. Vildum bara þakka fyrir starfið þeirra og óska þeim góðs gengis í leitinni en því miður póstaðist þetta á röngum tíma og var strax tekið út. Mannleg mistök og vonandi skiljið þið það gerist. Ást og friður og vonandi verður nóttin ykkar góð.“
Það voru ekki allir sem tóku þessa útskýringu Tinnu góða og gilda. „Það var bara einhver sem klúðraði og las virkilega illa í aðstæður. Segðu það bara í staðinn fyrir að halda fram að þetta hafi verið póstað á “röngum tíma” hvað sem það þýðir,“ segir í einni athugasemd.
