Hraunað yfir KFC á Matar­tips: „Ég gafst upp á lúgunni“

Svo virðist vera sem margir lands­menn hafi lent í vand­ræðum í bíla­lúgunni á skynd­bita­staðnum KFC, ef marka má ítar­lega og langa um­ræðu um málið inni á Face­book hópnum Matar­tips.

„KFC bíla­lúgan og rangar pantanir, hverjir tengja?“ spyr Thelma Rut Sigurðar­dóttir inni á hópnum. Þar lýsir hún því hvernig hún fékk ranga pöntun í annað skiptið á stuttum tíma hjá skyndi­bita­staðnum.

Vantaði heila máltíð

Þá var mis­skilningurinn svo mikill að mál­tíð eigin­manns hennar var hrein­lega ekki til staðar í pokanum frá KFC.

„Ég hringi í KFC og það svarar þar stelpa sem segist geta gefið mér inn­eign fyrir einni mál­tíð og ég megi koma og sækja hana.
Það hentaði mjög illa enda vorum við orðin mjög svöng, búin að koma okkur fyrir og næsti KFC staður langt í burtu.

Ég óskaði því eftir ein­faldri endur­greiðslu á vörunni sem ég fékk ekki af­greidda og var planið að panta heim­sendingu á öðrum mat til að þurfa ekki að ganga í gegnum ó­makið að fara aftur.
Mér var tjáð að það væri ekki í boði að fá endur­greiðslu á röngum pöntunum, þó svo að maður hafi ekki fengið það sem maður borgaði fyrir.

Að lokum óskaði ég þá eftir að fá að nýta inneignina strax en að þau þyrftu að bæta okkur þetta upp með því að færa okkur matinn enda hefðum við ekkert tilefni til þess að vinna fyrir þau við það að leiðrétta mistökin þeirra. Fékk einfalda neitun við því og endurtekið við mig að við þyrftum að standa í öllu stappi sem varðar að bæta upp mistökin þeirra og að þau ætluðu að halda peningunum okkar með því að neita endurgreiðslu og neyða okkur í að tapa vörunni eða versla við þau... aftur... “

120 manns lagt orð í belg

Thelma segir að sér þyki þetta óboðleg þjónusta hjá skyndibitastaðnum. Ó­hætt er að full­yrða að færslan hafi vakið mikla at­hygli en 120 manns leggja orð í belg. Mjög margir virðast einnig hafa lent í vand­ræðum í lúgunni á KFC en þó nokkrir segjast aldrei hafa lent í stökustu vand­ræðum.

„Er aaaaaaaalltaf að fá rangar pantanir úr bíla­lúgu. Sjúk­lega þreytandi. Þau svöruðu fyrstu 2 skriftin á Face­book en svo eru þau hætt að svara mér þrátt fyrir að þau opni skila­boðin frá mér,“ skrifar einn.

„Þetta kallast dag­legt brauð hjá kfc. þetta gerist í 90% til­fella, alveg magnað dæmi mætti halda að biluð vél­menni gætu gert betur,“ segir annar.

„Þekki þetta því miður vel. Keyri ekki frá lúgunni fyrr en ég er búin að fara yfir það sem ég fæ af­hent!“ skrifar sá þriðji.

„Hef marg oft pantað í lúgu hjá kfc í mörg mörg ár og aldrei lent í svona,“ skrifar einn.

Um­ræðan á Matar­tips.