Hörunds­ári ráð­herrann sem reiddist Pálma: Út­málaði hann sem stirð­busa­legan, stamandi og heimskan þurs

Hring­braut vitnaði fyrr í dag í við­tal Morgun­blaðsins við leikarann Pálma Gests­son sem gerði meðal annars garðinn frægan með Spaug­stofunni. Þar kom fram að Spaug­stofan ein­beitti sér að miklu leyti að taka þing­menn og ráð­herra fyrir. Flestir tóku því vel fyrir utan einn. Um það sagði Pálmi Gests­son:

„Þó var einn sem var mjög ó­sáttur við mig. Hann reyndi að fá út­varps­stjóra til að taka þáttinn af dag­skrá. Við höfðum heil­mikil á­hrif og ef út í það er farið heil­mikil völd. Þetta var ekki bara eitt­hvert sprell. Þetta var beitt gagn­rýni og það kom fyrir að fólk hringdi í okkur til að klaga ein­hvern og reyna að fá okkur til að gera á­kveðna hluti.“

En hver var þessi ráð­herra? Jú, í ævi­sögu Hall­dórs Ás­gríms­sonar, fyrr­verandi formanns Fram­sóknar­flokksins, kemur það fram. Ferill Hall­dórs sem stjórn­mála­manns var einn öldu­dalur og sjaldan sléttur sjór. Hall­dór sem nú er látinn og var um tíma for­sætis­ráð­herra, mátti þola afar nei­kvæð skrif í fjölmiðlum vegna Íraks­stríðsins, síðan fjöl­miðla­málsins og að lokum hags­muna­tengsla hans við sölu á Búnaðar­bankanum. Pálmi Gests­son lék Hall­dór í Spaug­stofunni og þótti Hall­dóri með­ferðin nei­kvæð. Í ævi­sögu Hall­dórs segir:

„Viku­lega birtist Pálmi Gests­son leikari á skjánum í gervi Hall­dórs þar sem hann út­málaði hann sem hálf­gerðan þurs, stirð­busa­legan og hálf­stamandi og seinan til að fatta nokkuð. Þetta var skrum­skæling, sem sýndi Hall­dór í afar nei­kvæðu ljósi, og virðist hafa farið mjög í taugarnar á honum. Hann sagði í við­tali að sér þætti spýtu­karla­leikur Pálma til­komu­lítill. Pálmi væri enginn sér­fræðingur í sér, hefði aldrei talað við sig og vissi ekkert um sig.“

Í ævi­sögunni kemur fram að Hall­dór hafi verið hörunds­ár og þá segir að það hafi verið mis­tök hjá Hall­dóri að tjá sig með þessum hætti eða eins og segir í sögu Halldórs:

„Það bætti gráu ofan á svart.“