Hörður Felix um mál Kol­beins: „Er þetta raun­veru­lega það þjóð­fé­lag sem við viljum lifa í?“

Hæstarréttarlögmaðurinn Hörður Felix Harðar­son segir að það sé rangt að lög­maður á vegum KSÍ hafði eitt­hvað að gera með dóms­átt sem Kol­beinn Sig­þórs­son gerði við tvær konur árið 2017.Hann var um­ræddur lög­maður í málinu og ætti því að vita það. Þetta kemur fram í grein Harðars á Vísi.is

Hörður segir ekki sann­leiks­korn í frá­sögn konunnar sem steig fram um að hann hafi verið að vinna fyrir KSÍ eða boðið henni þagnar­skyldu­samning á nokkrum tíma­punkti. Málinu lauk með sátt árið 2017 en nú er Kolbeinn líklegast að fara missa lífsviðurværi sitt vegna þess.

„Mál­efni knatt­spyrnu­mannsins Kol­beins Sig­þórs­sonar hefur verið mikið í um­ræðunni síðustu daga. Upp­haf um­ræðunnar er að rekja til þess að kona sem kveðst hafa orðið fyrir of­beldi af hálfu lands­liðs­mannsins á árinu 2017 steig fram. Af­leiðingarnar eru þekktar. For­maður KSÍ sagði af sér og síðar öll stjórnin. Áður en til af­sagnar stjórnar KSÍ kom tók hún á­kvörðun um að taka Kol­bein Sig­þórs­son út úr lands­liðs­hópnum. Fram hefur komið að þjálfarar liðsins, sem hafa það hlut­verk að á­kveða hverjir skipi lands­liðs­hópinn hverju sinni, höfðu ekkert með þessa á­kvörðun að gera,“ skrifar Hörður Felix í grein á Vísi.

„Á­kvörðun stjórnar KSÍ um að nafn­greina Kol­bein og taka hann út úr lands­liðs­hópnum, vegna þessa 4 ára gamla at­viks, hefur leitt til mikillar um­fjöllunar um Kol­bein í er­lendum miðlum,“ heldur Hörður á­fram og bætir við að það hefur komið fram að at­vinnu­rekandi Kol­beins, IFK Gauta­borg, líti málið al­var­legum augum og þar sé á­kall um að samningi við leik­manninn verði rift.

„Konan sem steig fram, og hefur farið mikinn í fjöl­miðlum, lýsti því svo að lög­maður á vegum KSÍ hafi haft sam­band við hana og boðað hana til fundar með með­limum stjórnar KSÍ til að ganga frá „þagnar­skyldu­samningi“. Vakti þetta mikla at­hygli enda án nokkurs vafa frétt­næmt ef ein­hver á vegum sam­bandsins hefði gegnt þessu hlut­verki. Síðar kom fram hjá um­ræddri konu að undir­ritaður hafi að líkindum verið sá lög­maður sem í hlut átti. Í þessari frá­sögn er hins vegar ekki eitt sann­leiks­korn. Undir­ritaður átti aldrei í sam­skiptum við konuna, var ekki að vinna fyrir KSÍ í þessu máli, boðaði ekki til fundar með stjórnar­manni KSÍ og bauð henni ekki á nokkrum tíma­punkti „þagnar­skyldu­samning“. Þessi fram­setning var hins vegar ó­neitan­lega meira frétta­efni en sann­leikurinn,“ skrifar Hörður.

Er það rétt og eðli­legt að ein­staklingar séu for­dæmdir og út­skúfaðir með þessum hætti, án dóms og laga?

Kol­beinn Sig­þórs­son lét frá sér yfir­lýsingu í vikunni, í til­efni af um­fjöllun konunnar, sem er að öllu leyti sann­leikanum sam­kvæm, að mati Harðar.

Um­rædd kona, og vin­kona hennar, lögðu fram kæru til lög­reglu vegna ætlaðrar hátt­semi Kol­beins á skemmti­stað. Kol­beinn tók þá kæru al­var­lega, eðli málsins sam­kvæmt, og leitaði að­stoðar undir­ritaðs. Minni hans og upp­lifun af at­vikum þetta kvöld var tals­vert önnur en kvennanna tveggja. Hann sýndi hins vegar á­byrgð og átti fund með konunum þar sem þær lýstu sinni upp­lifun. Hann sýndi því skilning og baðst inni­legrar af­sökunar á sínum þætti í málinu. Þá varð hann við öllum kröfum kvennanna um greiðslur og málinu var lokað í sátt og sam­lyndi. Lög­reglan felldi málin tvö niður í kjöl­farið.

„Er þetta raun­veru­lega það þjóð­fé­lag sem við viljum lifa í? Er það rétt og eðli­legt að ein­staklingar séu for­dæmdir og út­skúfaðir með þessum hætti, án dóms og laga? Átti Kol­beinn að bregðast öðru­vísi við á sínum tíma eða er það ein­fald­lega svo að ferill knatt­spyrnu­manna sé á enda við hvers kyns hugsan­legar mis­fellur eða á­sakanir? Það er mat undir­ritaðs að þessi á­kvörðun stjórnar KSÍ hafi verið ein­stak­lega mis­ráðin en ef­laust hefur sú geðs­hræring sem ein­kennt hefur alla um­ræðu í þjóð­fé­laginu undan­farna daga haft þar mikil á­hrif. Jafn þarft og sjálf­sagt og mál­efnið er þá verður að gæta þess að jafnt um­ræða sem þær á­kvarðanir sem teknar eru, og varða mikils­verð réttindi ein­stak­linga, séu teknar fag­lega og af yfir­vegun,“ skrifar Hörður að lokum.