Hörður Ægis hjólar í Lilju: „Tíma­setningin er með ó­líkindum“

Við­skipta­blaða­maðurinn Hörður Ægis­son gerir um­mæli Lilju Al­freðs­dóttur, ferða­mála-, við­skipta og menningar­mála­ráð­herra, að um­tals­efni í nýjum pistli sínumá Innherja.

Lilja sagði ný­verið að bankarnir ætti að nota „ofur­hagnað“ sinn til að „greiða niður vexti fólks í landinu.“ Í við­tali við Morgun­blaðið bætti húns vo við að fari þeir ekki að þessum til­mælum væri til­efni til að endur­vekja banka­skattinn.

Hörður segir þessi um­mæli vera með ó­líkindum og lík­leg til að rýra veru­lega virði Ís­lands­banka.

„Til­lögur ráð­herrans, sem situr jafn­framt í ráð­herra­nefnd um efna­hags­mál og endur­skipu­lagningu fjár­mála­kerfisins, eru settar fram á sama tíma og ríkis­sjóður – eig­andi að stórum hluta banka­kerfisins – á­formar á komandi vikum að halda á­fram með sölu á hlutum sínum í Ís­lands­banka,“ skrifar Hörðu.

„Tíma­setningin er því með ó­líkindum og aug­ljós­lega til þess fallin – jafn­vel óháð því hvort hinar mis­ráðnu hug­myndir Lilju verði að veru­leika á næstunni – að rýra veru­lega virði þess verð­mæta hlutar sem til stendur að selja, með til­heyrandi tjóni fyrir skatt­greið­endur.“

Hörður fer yfr stöðu hag­kerfisins á Ís­landi í dag í löngu máli og tekur fram að ef undan eru skilin síðustu tvö ár hafa vextir Seðla­bankans aldrei verið lægri í Ís­lands­sögunni.

„Það skýtur því skökku við núna þegar bankinn hefur ráðist í ó­um­flýjan­lega vaxta­hækkun til að bregðast við miklum og vaxandi verð­bólgu­þrýstingi – vextir hækkuðu í síðustu viku úr 2 prósentum í 2,75 prósent – að reynt sé af sumum að teikna upp þá mynd af stöðunni að mörg heimili standi frammi fyrir ein­hvers konar neyðar­á­standi vegna aukinnar skuld­setningar og breytts vaxta­um­hverfis sem er að leita aftur í eðli­legra jafn­vægi.“

„Ekkert í opin­berum hag­tölum gefur sem betur fer til kynna að sú greining standist nokkra skoðun. Staða heimilanna hefur sjaldan verið sterkari en nú. Engar vís­bendingar eru um meiri van­skil þeirra og sem hlut­fall af ráð­stöfunar­tekjum hafa skuldir heimilanna að­eins vaxið lítil­lega og eru lægri á þann mæli­kvarða en á öllum hinum Norður­löndunum.“

Hægt er að lesa pistil Harðar hér.