Hólmfríður fékk óhugnanleg skilaboð: „Hæ! Einn daginn kem ég til þín. Ég veit hvar þú býrð“

Svo virðist sem dularfullur einstaklingur, eða einstaklingar, herji nú á alþjóðlegan bókabransa og er sá íslenski engin undantekning í þeim efnum. Viðkomandi hefur ítrekað villt á sér heimildir og blekkt rithöfunda, forleggjara og þýðendur til að láta af hendi óútgefin handrit.

Ítarlega er fjallað um þetta óvenjulega mál í Fréttablaðinu í dag og fjallar forsíðufrétt blaðsins meðal annars um málið.

Meðal þeirra sem hafa lent í þjófnum, eða fengið skilaboð frá honum, er Hildur Knútsdóttir rithöfundur en nýjasta bók hennar kom út í vikunni. Um síðustu helgi fékk hún tölvupóst frá, að því er virtist Tone Myklebost, sem er mikilsvirtur norskur þýðandi, og óskaði hann eftir því að fá að lesa pdf-útgáfu af handriti hennar.

„Ég fékk sem sagt bara tölvu­póst á laugar­dags­kvöldið frá Tone, að ég hélt. Ég hef alveg verið vöruð við þessu,“ sagði Hildur sem hafði varann á eftir að hafa heyrt af máli rithöfundarins Björns Halldórssonar. Ræddi hún við Valgerði Benediktsdóttur hjá réttindastofunni á Forlaginu áður en hún svaraði hinum meinta þýðanda.

Í fréttaskýringu Fréttablaðsins er einnig rætt við Hólm­fríði Úu Matthíasdóttur, sem lenti í því miður skemmti­lega at­viki í vikunni þegar hún fékk senda hótun frá bóka­þjóf. Í frétt blaðsins kemur fram að þjófurinn hafi villt á sér heimildir og sent Úu tölvu­póst í nafni Tone Myklebost. Var hún beðin um að senda pdf út­gáfu skáld­sögunnar Olíu eftir Svika­skáld, sem kom út nú á dögunum.

„Ég sá strax að þetta var þessi svindlari sem við vorum að tala um, í fyrsta lagi vegna þess að ég var náttúr­lega með­vituð um að þetta var í gangi en svo sá ég líka net­fangið. Svo er það bara þannig að þessi norski þýðandi, þó ég hafi verið í sam­bandi við hana, þá er það ekki þannig að hún sé skrifa mér og biðja mig um hand­rit,“ segir hún.

Úa sendi bóka­þjófnum því póst um hæl og spurði hvort hann myndi ekki vilja ræða málin við Silviu Cosimini, ítalskan þýðanda sem hann hefur áður þóst vera, og lét fylgja með falskt net­fang í nafni Silviu sem þjófurinn notaði.

„Með þessu var ég að segja ‚Við sjáum í gegnum þig.‘ Þá brást við­komandi ó­kvæða við og sendi mér skila­boð þar sem hann segir ‚Hæ! Einn daginn kem ég til þín. Ég veit hvar þú býrð‘.“

Þrátt fyrir að Úa hafi áður þurft að verjast á­sókn bóka­þjófsins þá lýsir hún at­vikinu sem fremur ó­þægi­legu og á­kvað hún, að hvatningu sam­starfs­fólks síns, að til­kynna málið til lög­reglu.

Hér má lesa fréttaskýringu Fréttablaðsins í heild sinni.