Hjúkrunar­fræðingur lýsir á­standinu á bráða­deild: „Ég hef miklar á­hyggjur“

Guð­laug Ásta Gunnars­dóttir, hjúkrunar­fræðingur á bráða­deild, segist kvíða að snúa aftur til vinnu eftir sumar­frí.

„Sumar­fríið hefur ekki farið í mikla úti­vist og af­þreyingu með fjöl­skyldunni því ég er ein­fald­lega ör­magna. Ég kvíði því að þurfa að snúa aftur til vinnu eftir nokkra daga,“ skrifar Guð­laug í pistli á Vísi.

„Ég byrjaði að vinna á hjúkrunar­heimili þegar ég var 16 ára gömul og hef því unnið í heil­brigðis­geiranum í rúm 20 ár. Þetta er það sem mér finnst gaman að gera og það sem ég vil vinna við. Ég er líka þriggja barna móðir, eins og staðan er orðin þá sé ég ekki fram á að geta haldið á­fram mínu starfi og geta líka sinnt börnunum mínum og heimilinu. Það er mjög brenglað að kvíða því að snúa aftur til vinnu sem maður elskar, heldur Guð­laug á­fram.

Hún segist vera á síðustu dropunum eftir heims­far­aldur Co­vid.

„Síðustu tvö ár í heims­far­aldri hafa vissu­lega tekið á en það gerðu líka árin þar á undan. Það er nefni­lega þannig að á­standið í heil­brigðis­þjónustunni var ekki gott fyrir far­aldurinn og nú er ég orðin hrædd um að kerfið sé hrein­lega að hruni komið.“

„Það er skortur á hjúkrunar­fræðingum, það er stað­reynd. Það eru of margir sjúk­lingar til að hægt sé að veita örugga þjónustu og pláss­leysið býr til nær ó­yfir­stígan­legt álag á okkur sem eftir stöndum. Er í al­vörunni ein­hver sem vill að öryggi skjól­stæðinga sé ekki tryggt? Ofan á það eru sí­fellt fleiri að hrökklast úr starfi sem þyngir róðurinn enn frekar. Spjallið meðal starfs­manna er farið að snúast um hversu lengi maður ætlar að endast og hvaða annan starfs­feril maður ætti að velja.“

„Ég hef á­hyggjur. Ég hef miklar á­hyggjur af því að það virðist enginn, nema þau sem vinna í heil­brigðis­geiranum, gera sér grein fyrir að við erum á síðustu dropunum. Ég óttast það raun­veru­lega að það sé að verða of seint að bjarga ís­lenska heil­brigðis­kerfinu eftir ára­tuga van­rækslu og svelti. Áttaði sig í al­vöru enginn sem tekur á­kvarðanir á því að þjóðinni væri að fjölga og eldast? Datt engum í hug að gífur­leg fjölgun ferða­manna setti álag á fleiri inn­viði en bara vega­kerfið og út­sýnis­staði?“ skrifar Guð­laug.

Hún segir að það séu til lausnir en það hefur skort þor a hrinda þeim í fram­kvæmd. Þá hafa hjúkrunar­fræðingar ekki fengið að semja um launin sín í 11 ár.

„. Nú siglum við aftur inn í það tíma­bil að samningar eru að losna og enn og aftur stendur ekki nógu vel á til að ríkið geti leið­rétt hlut kvenna­stétta. Ég vil hins­vegar hvetja ríkið til að sýna skyn­semi í komandi samningum, semja loksins við hjúkrunar­fræðinga og reyna að bjarga því sem bjargað verður,“ skrifar Guð­laug að lokum.