„Eftir allar þessar hremmingar er ég orðinn ofurlítið þreyttur á allri vitleysunni,“ segir Hjörleifur Hallgrímsson, eldri borgari og Akureyringur, í aðsendri grein í Fréttablaðinu í dag.
Hjörleifur segir farir sínar ekki sléttar af samskiptum við menntamálaráðuneytið og Minjastofnun, en Hjörleifur er eigandi byggðarlóðar á einum besta stað í Innbænum á Akureyri, Aðalstræti 12b. Nokkuð hefur verið fjallað um málið í fjölmiðlum undanfarin misseri.
Neitun á hæpnum forsendum
„Ég hafði látið teikna væntanlegt hús á lóðinni, þar sem má samkvæmt skipulagi standa tveggja hæða hús með kjallara og risi, um 117 fermetrar að flatarmáli. Fyrir rúmum fimm árum hefur svo samband við mig fornleifafræðingur og spyr hvort hann megi grafa í lóð mína til að athuga hvort fornminjar finnist þar, mér að kostnaðarlausu. Ég gaf honum leyfi til þess. Skömmu áður hafði hann grafið í sama tilgangi í stæði norðan við ísbúðina Brynju, sem er litlu norðar, og engar fornminjar fundið frekar en í minni lóð. En sagan er ekki öll sögð,“ segir Hjörleifur.
Undanfarin ár hefur hann staðið í ströggli við skipulagsnefnd Akureyrar þar sem hann vildi byggja hús á lóðinni með fjórum litlum íbúðum. Hjörleifur hefur hins vegar ítrekað fengið neitun á hæpnum forsendum, að hans mati. Þannig fékk hann tölvupóst frá skipulagsstjóra um að Minjastofnun hefði stöðvað framkvæmdir á lóðinni vegna áætlaðra fornminja þar og bréf með sams konar boðskap fékk hann svo frá stofnuninni.
„Þegar hér var komið sögu og búið var að stöðva framkvæmdir á lóðinni leitaði ég til þess ágæta rithöfundar og sagnfræðings Jóns Hjaltasonar, sem hafði skrifað sögu Akureyrar í 5 bindum frá 890 -1962 og tók sérstaklega fyrir Innbæinn og spurði hann álits. Hann skrifaði fyrir mig greinargerð í 12 liðum þar sem hann fullyrti með 99% vissu að engar fornminjar væri að finna í lóðinni. Einnig er í bókinni Akureyri fjaran og Innbærinn, þar sem hinn virti arkitekt Hjörleifur Stefánsson kemur að útgáfu hennar og fjallar um uppbyggingu húsa í Innbænum, hvergi minnst á fornminjar.“
Vill milljón fyrir hvert ár
Þar sem Minjastofnun heyrir undir menntamálaráðuneytið sneri hann sér þangað í þeirri von að fá leiðréttingu á málinu. Hann kveðst svo hafa hitt Lilju Alfreðsdóttur menntamálaráðherra á Akureyri og átt við hana persónulegt samtal um lóðarmálið í von um ásættanlega lendingu. Til að gera langa sögu stutta hefur lítið gerst í málinu og nefnir Hjörleifur að engar fornminjar hafi fundist á lóðinni.
„Fimm ár tók það mig að nurla saman fyrir kostnaði við uppgröftinn, sem hljóðar upp á 1,2 milljónir með vélavinnu. Það er svona þegar fjármálaráðherra heldur ellilífeyrisþegum í þúsundatali á launum, sem duga vart til nauðþurfta, um 250 þúsund krónum á mánuði. Er þá furða að það tæki mig 5 ár að nurla saman fyrir kostnaðinum,“ spyr Hjörleifur sem sendir að lokum áskorun til Lilju.
„Ég ætla samt í lokin að skora á Lilju ráðherra að hlutast til um að mér verði bættur skaðinn. Í 5 ár með 5 milljóna króna bætur til mín, eða 1 milljón fyrir hvert ár, sem búið er að hafa af mér, þar sem ég hef hvorki getað byggt né selt lóðina. Eftir allar þessar hremmingar er ég orðinn ofurlítið þreyttur á allri vitleysunni, enda orðinn dálítið fullorðinn og væri ánægður ef einhver vildi kaupa lóðina og byggja þar fallegt hús, því hér áður fyrr stóð á lóðinni eitt fallegasta hús landsins, eða gamla Hótel Akureyri.“
