Staksteinahöfundur Morgunblaðsins í dag liggur ekki á skoðunum sínum frekar en fyrri daginn en nú eru það hjólreiðamenn sem fá að heyra það.
Blaðið gerir tillögu Kolbrúnar Baldursdóttur, borgarfulltrúa Flokks fólksins, á fundi skipulags- og samgönguráðs borgarinnar í gærmorgun að umtalsefni. Snerist tillagan um að setja hámarkshraða á göngu- og hjólastígum og aðliggjandi gangstéttum til að tryggja öryggi hjólandi og gangandi.
„Hjólreiðar hafa aukist og er það vel. Hins vegar hafa kvartanir einnig aukist sem lúta að hættu sem stafar af hjólreiðamönnum sem hjóla fram hjá gangandi vegfaranda eða hjólreiðamanni á mikilli ferð,“ sagði Kolbrún.
Benti hún á að heimilt væri að hjóla á gangstétt, göngustíg eða göngugötu, enda valdi það ekki gangandi vegfarendum hættu eða óþægindum eða liggi sérstakt bann við því. Þá skuli hjólreiðamaður gæta ýtrustu varkárni og ekki hjóla hraðar en svo að hann geti vikið úr vegi fyrir gangandi vegfarendum.
Að mati Kolbrúnar hefur skort á að borgaryfirvöld birti og minni á reglur um hjólreiðar. „Skortur er á viðeigandi fræðslu og viðvörunum svo varast megi óhöpp og slys. Slys hafa orðið og enn oftar legið við slysum þar sem hjólandi ekur fram hjá á miklum hraða og rekur sig í hjólreiðamann, eða gangandi vegfaranda eða hunda. Ekki er nóg að leggja hjólreiðastíga heldur verður yfirvald einnig að sýna tilhlýðilega ábyrgð og sinna fræðslu til að fyrirbyggja slys og óhöpp.“
Óhætt er að segja að staksteinahöfundur taki undir þetta í Morgunblaðinu í dag.
„Þetta er rétt. Borgaryfirvöld mála hjól á götur án þess að það hafi gildi að lögum. Stundum þvert yfir hefðbundin bifreiðastæði. Frekjur hjóla á ofsahraða yfir GANGBRAUT og ætlast til að bifreiðar hvellstöðvi. Þekktar reglur um gangbrautir eru komnar í graut fyrir tilverknað yfirvalda.“
