Hjalti Jón Sveinsson, skólameistari og eigandi hesthúss í Víðidal, óttast að hann og fleiri hesthúsaeigendur muni standa uppi með verðlausar eignir. Hjalti viðrar þessar áhyggjur sínar í aðsendri grein í Morgunblaðinu í dag.
„Mér varð það á fyrir fimm árum, þegar ég flutti til Reykjavíkur eftir langa fjarveru, að kaupa hesthús þar án þess að gera mér grein fyrir að lóðarleigusamningurinn til 25 ára frá árinu 1970 var löngu runninn út. Staða mín er því sú samkvæmt samningnum að hann framlengist sjálfkrafa um tvö ár sé honum ekki sagt upp. Þá hvílir sú kvöð á mér að ef til þess kæmi beri mér að afmá öll ummerki um að þarna hafi einhvern tímann staðið hesthús,“ segir Hjalti í grein sinni.
Hann segir að það gefi auga leið að öryggi þeirra sem eru í þessari stöðu sé ekki meira en skilja má á orðanna hljóðan.
„Þetta gæti þýtt að vonlaust sé að selja þessi hesthús til þeirra sem vilja slást í hópinn þegar við, sem eldri erum, kjósum að draga okkur í hlé eða minnka við okkur, eins og sagt er. Ég óttast að einn góðan veðurdag munum við standa uppi með verðlausar eignir. Þessar aðstæður gera það einnig að verkum að við förum tæplega í kostnaðarsamar endurbætur á húsum okkar.“
Hjalti segist hafa kosið Víðidalinn á sínum tíma þar sem hann hafði stundað hestamennsku og útreiðar á árum áður. Það sem vó hvað þyngst var þó að svæðið býður útreiðarfólki upp á marga mismunandi kosti og þá liggi leiðir frá svæðinu um víðan völl.
Hann segir að á þessu fimm ára tímabili hafi byggðin austan við hesthúsahverfið stækkað í áttina að Víðidalnum. „Því er ekki skrítið að maður fari að hugsa sinn gang og spyrji þeirrar spurningar hvort að því geti komið þegar síst varir að við hesthúsaeigendur þurfum að hirða pjönkur okkar í Víðidalnum og láta okkur hverfa eða að hasla okkur völl með tvær hendur tómar í Almannadal.“
Hjalti vísar í viðtal Morgunblaðsins við Dag B. Eggertsson borgarstjóra þann 6. nóvember síðastliðinn og segir hann að ekkert sé í kortunum sem bendi til þess að breyting verði á skipulagi svæðisins á næstunni og því séu áhyggjur hans óþarfar. Sagði Dagur meðal annars að Víðidalurinn sé og verði í hans huga paradís hestamanna og heimavöllur hestaíþróttarinnar um fyrirsjáanlega framtíð.
„Ég spyr: Ef sú er raunin sem borgarstjóri lýsir hér; af hverju er þá ekki unnt að finna leið að samningum milli borgarinnar og hesthúsaeigenda í Víðidal sem tryggja sanngirni og jafnræði? Sjálfur geri ég ekki endilega kröfu um samning til 50 ára, ef það er málið, en ég tel mestu skipta að sett verði í samninginn ákvæði um uppkaup ef vera kynni að húsin þyrftu að víkja fyrir íbúðabyggð,“ segir Hjalti sem leggur til að aðilar setjist niður og komist að samkomulagi sem báðir aðilar geta unað við.
