„Það er grafalvarlegt mál - sérstaklega og sér í lagi við svona kringumstæður - að grafa undan tiltrú fólks á tilmælum og ákvörðunum hins opinbera. Það ætti enginn að gera nema hafa mjög ríkar ástæður til og þá annað hvort vegna sérfræðiþekkingar sinnar, eða upplýsinga sem yfirvöld hafa ekki.“
Þetta segir Hjálmar Gíslason, framkvæmdastjóri GRID og stjórnarformaður Kjarnans, í grein sem birtist á vef Kjarnans í morgun.
Pistillinn hefur vakið talsverða athygli en þar skrifar Hjálmar um viðbrögðin við COVID-19 veirunni, eða öllu heldur umræðuna um veiruna sem hann telur vera á villigötum í sumum tilfellum.
Hjálmar segist óttast að þeir sem draga aðgerðir yfirvalda í efa, til dæmis með því að heimta harðari aðgerðir, til að stemma stigu við útbreiðslunni átti sig ekki á því að þeir geti verið að gera illt verra.
„Hvers vegna? Vegna þess að eftir því sem fólk heyrir fleiri ólíkar og mismunandi útgáfur af því hvað sé rétt og satt, og hvað sé rétt að gera, því minna treystir það „öllu” sem sagt er um málið og verður "ónæmt" fyrir upplýsingum um málið óháð því hvaðan þær koma. Á endanum verður það svo til þess að fólk verður líklegra til að leiða mikilvæg tilmæli hjá sér og fara þannig óvarlegar en ella.“
Segir Hjálmar að þegar fólk veit ekki hverju það á að trúa þá hætti það að trúa nokkru.
Hann segir að það sé gott að vera gagnrýninn og spyrja spurninga, en að sama skapi þurfi að bera virðingu fyrir sérfræðingum og fagfólki sem starfar fyrir okkur.
„Fólk sem hefur gert það að ævistarfi sínu að læra um, rannsaka og búa sig undir akkúrat þessar kringumstæður „er” betur í stakk búið til að meta kostina í stöðunni hverju sinni og taka ákvarðanir út frá bestu mögulegu upplýsingum og þekkingu,“ segir hann meðal annars.
Hann segir að spurningum, til dæmis um af hverju landinu er ekki lokað og af hverju er ekki búið að setja á samkomubann, hafi verið svarað margoft á upplýsingafundum sem haldnir hafa verið daglega. „Sumum margoft,“ bætir hann við.
Pistil Hjálmars má lesa í heild sinni á vef Kjarnans.
