Christian B., 43 ára gamall Þjóðverji sem grunaður er um aðild að hvarfi Madeleine McCann árið 2007, hefur einnig verið til rannsóknar hjá þýskum löggæsluyfirvöldum vegna hvarfs fimm ára stúlku árið 2015.
Lögregla telur margt benda til þess að Christian hafi rænt Madeleine á Algarve árið 2007 og ráðið henni bana.
Sjá einnig: Þetta er vitað um hinn grunaða í máli Madeleine McCann.
BBC greinir frá því – og vísar í umfjöllun þýskra fjölmiðla – að stúlkan, Inga Gehricke, hafi horfið þann 2. maí árið 2015. Hún var á ferðalagi með fjölskyldu sinni í Saxlandi-Anhald. Þess er getið að Christian hafi verið búsettur ekki langt frá á þessum tíma, eða í borginni Brúnsvík (þ. Braunschweig).
Lögregla hefur ekki viljað staðfesta eitt eða neitt í sambandi við málið en heimildir þýskra fjölmiðla herma að lögregla hafi leitað ítarlega að Ingu á landsvæði við heimili Christians í febrúar 2016.
Þýska blaðið Volksstimme segir frá því að einnig hafi verið leitað á heimili Christians. Ekkert hefur spurst til Ingu frá hvarfi hennar og virðist rannsókn lögreglu á Christian hafa verið hætt eftir að ekkert fannst sem bendlaði hann við hvarfið.
Fjölskylda Ingu var að grilla umrætt laugardagskvöld í skóglendi í Wilhelmshof í maí 2015. Inga hafði verið við leit að eldivið skammt frá en hvarf skyndilega sporlaust um kvöldmatarleytið. Skipulögð leit var gerð í skóginum en hún skilaði engum árangri.
