„Hinar ís­köldu“ - Auð­virði­legar mann­leysur með enga sam­kennd: Verðum minni mann­eskjur

„Ríkis­stjórn Ís­lands sýnir sitt rétta and­lit með brott­vísun barna til Grikk­lands í nótt eða aðra nótt.“

Þetta sagði Steinunn Ó­lína Þor­steins­dóttir leik­kona og gagn­rýnir harð­lega ríkis­stjórnina. Hún segir að tvær ungar konur, Katrín Jakobs­dóttir for­sætis­ráð­herra og Ás­laug Arna Sigur­björns­dóttir dóms­mála­ráð­herra hafi tekið þá á­kvörðun að senda ung flótta­börn og fjöl­skyldur þeirra til Grikk­lands á sama tíma og þjóðar­leið­togar annara Evrópu­ríkja bjarga börnum þaðan vegna skelfingar­á­stands sem þar ríkir.

Sema Erla Serdar hélt því fram fyrr í dag að brott­vísun hefði verið frestað og það væri lík­lega vegna að­stæðna þar. Í til­kynningu frá Út­lendinga­stofnun segir að það sé ekki rétt að grísk stjórn­völd hafi hafnað því að taka við ein­stak­lingum sem hafa fengið al­­þjóð­­lega vernd í Grikk­landi heldur hafi brott­vísunum einungis verið frestað tíma­bundið vegna breytinga í stjórn­sýslunni. Það standi því enn til að henda börnunum úr landi.

Börnin sem á að henda úr landi

Þá segir Steinunn að þó al­menningur öskri sig hásan á sam­skipta­miðlum heyrist engin við­brögð frá „hinum ís­köldu“ Katrínu og Ás­laugu Örnu.

„Hluti lands­manna svo gjör­sam­lega af­tengdur að hann fyllir nú hillur af stroga­noff og salt­síld eftir ráð­leggingum al­manna­varna, grætur af­lýstar skíða­ferðir og heldur gala-kvöld þegar hann lýkur sótt­kví. Sjálf­hverf, stríðalin og spillt þjóð,“ segir Steinunn og bætir við:

„Við skulum átta okkur á því að við munum öll tapa í þessu máli og verða minni mann­eskjur á eftir. Auð­virði­legar mann­leysur sem eiga enga sam­kennd til og þannig mun sagan minnast okkar. Ís­lensk stjórn­völd gera okkur nú með­sek í glæpum sínum gegn mann­kyninu og við munum aldrei bíða þess bætur. Aldrei.“