Fjárhagsáætlun Reykjavíkurborgar var kynnt í gær. Í henni kom fram að reiknað er með 6 milljarða króna halla á næsta ári og útgönguspár benda til þess að hallinn á þessu ári verði rúmlega 15 milljarðar.
Í viðtali hjá Fréttablaðinu segir Hildur það valda áhyggjum.
„Þetta eru gríðarlega háar fjárhæðir og við höfum miklar áhyggjur af stöðunni. Við sjáum 15,3 milljarða króna halla fyrir árið 2022 og mér finnst nauðsynlegt að benda á að þetta er næstum því sexfaldur halli miðað við það sem áætlun gerði ráð fyrir, fyrir þetta ár,“ sagði Hildur.
„Við lýsum yfir gríðarlegum áhyggjum af stöðunni. Við sjáum líka að skuldir halda áfram að aukast, þær eru að aukast um 35 milljarða núna á milli ára og við höfum sjaldan séð aðra eins aukningu á milli ára.“
Í færslu sem Hildur birti á Facebook í morgun lætur hún meirihlutann í borginni heyra það.
„Einar Þorsteinsson sagði fram undan mestu hagræðingaraðgerðir frá hruni. Í dag sendir meirihlutinn svo 64 blaðsíðna bækling um húsnæðisuppbyggingu í öll hús á höfuðborgarsvæðinu. Ég er með hagræðingartillögu. Sleppum þessu,“ sagði Hildur í færslunni.
