„Girðum okkur í brók og tökum á þessu. Ég nenni þessu ekki lengur,“ segir Hildur Ýr Ísberg, íslenskukennari við Menntaskólann við Hamrahlíð.
Hildur skrifaði býsna kraftmikinn pistil á Facebook nú í morgunsárið þar sem hún velti fyrir sér skólakerfinu, stöðu drengja og vanlíðan barna.
„Ég velti því fyrir mér hversu margar ráðstefnur, greinar, þætti og ræður þarf að búa til um stöðu drengja í skólakerfinu áður en eitthvað raunverulegt gerist til þess að breyta þessari stöðu, þessu kerfi og þessari líðan,“ spyr Hildur í pistli sínum.
„Ég velti því LÍKA fyrir mér hvernig í veröldinni stendur á því að enginn hefur áhuga á stöðu annarra kynja í skólakerfinu? Niðurstöður rannsókna benda til þess að stúlkum líði mun verr en drengjum og transbörnum allra verst í þessu skólakerfi - drengir koma verr út úr læsi.“
Hildur spyr hvar ráðstefnur, bækur, greinar og ræður um vanlíðan þessara barna séu.
„Eru þau kannski ekki nógu merkileg til þess að um þau sé fjallað? Eða höfum við kannski ekki raunverulegan áhuga á því að viðurkenna að kerfið virkar illa fyrir öll kyn og mjög mörg börn og því er mjög brýnt að bregðast við?“
Að mati Hildar þurfum við að hafa kjark til að taka þessa umræðu heildstætt.
„Ég byrjaði að kenna fyrir tuttugu árum og á þeim tíma hef ég séð ótal rannsóknir, ráðstefnur og greinar um stöðu drengja. Ég hef aldrei séð hliðstæð viðbrögð við stöðu annarra kynja þó hana megi lesa mjög skýrt úr sömu gögnum. Girðum okkur í brók og tökum á þessu. Ég nenni þessu ekki lengur.“
