„Ég hef aldrei hlýtt Víði eða lagt allt mitt traust á þríeykið í þessari baráttu gegn veirunni, hef bara hlustað á þetta góða og gagnlega fólk og tekið mark á því en síðan notað mína eigin skynsemi, af því að ég er það sem kallast fullorðin.“
Þetta segir Hildur Eir Bolladóttir, prestur í Akureyrarkirkju, í færslu á Facebook-síðu sinni.
„Að sama skapi hef ég ekki hlýtt læknunum mínum í krabbameinsmeðferðinni heldur hlustað á þá og tekið mark á þeim en síðan notað mína eigin skynsemi, af því að ég telst víst fullorðin,“ segir Hildur og bætir við að við séum fullorðin þjóð, hlustum á upplýsingar og notum svo eigin skynsemi hvert og eitt. Það sé auðvitað krefjandi það heiti að vera fullorðinn.
„Áfram Víðir, Þórólfur og Alma og áfram fullorðin íslensk þjóð,“ segir Hildur.
Hildur er þekkt fyrir góð og gagnleg skrif og í því samhengi má benda á heimasíðuna hennar, hildureir.is. Í nýjasta pistli sínum fjallar hún til dæmis um nokkur sálræn bjargráð á tímum COVID-19.
