„NEI, nei, nei, við erum ekki að fara þangað, þá er skárra að leyfa bara veirunni að hafa sinn gang án mótspyrnu,“ segir Hildur Eir Bolladóttir, prestur í Akureyrarkirkju, í pistli á Facebook-síðu sinni.
Hildur Eir vísaði þar í spurningu til Páls Matthíassonar, forstjóra Landspítalans, í gær þess efnis hvort gerði yrði lögreglurannsókn á hópsmitinu á Landakotinu sem hefur dregið sjúklinga þar til dauða undanfarna daga.
„Pabbi lést á Landakoti fyrir tólf árum þá rétt rúmlega sjötugur að aldri úr Levy-sjúkdómnum, eða nei, sennilega dó hann úr lungnabólgu. Ég man það ekki, man bara að í rúminu við hlið hans var maður með Nóróveiru og ég var ófrísk og bað um að þeir yrðu færðir í sitthvort herbergið af því að mig langaði að kveðja pabba án þess að eiga á hættu að fá Nóróveiru og æla barninu út,“ segir Hildur í færslunni.
Hún segir að úr þessu hafi verið leyst og þau átt góða síðustu daga við sjúkrabeð pabba.
„Þetta heitir lífið, það er fullt af sárum vörðum, pabbi var með alvarlegan undirliggjandi sjúkdóm en dó síðan úr lungnabólgu eða einhverri pest, það var engum að kenna. Starfsfólk Landakots umvafði hann kærleika og umhyggju, það er hugsjón þeirra sem velja þennan illa launaða starfsvettvang, fólk ræður sig ekki á Landakot til að græða peninga, svo mikið er víst. En við förum ekki að sækja fólk til saka vegna smita Covid 19, ef það verður raunin þá er ljóst að afleiðingar smitvarna eru orðnar skaðlegri en veiran.“
