Hermann Guðmundsson, forstjóri Kemi og fyrrverandi forstjóri N1, segist telja að hugmyndir um Borgarlínu séu lausn 20. aldarinnar en alls ekki 21. aldarinnar.
Hermann gerir þetta að umtalsefni á Facebook-síðu sinni og bendir á að í Bandaríkjunum séu að spretta upp stór fyrirtæki sem koma með nýjar lausnir á gömul vandamál.
„Eitt af þessum fyrirtækjum heitir Beep og það gerir út mannlausar skutlur fyrir 10-12 manns. Þessar skutlur ganga eftir fyrir fram ákveðnum leiðum og eru rafdrifnar. Ég hef þegar séð þær að störfum í Orlando og það eru nokkur fylki þegar búin að taka upp þessa þjónustu í afmörkuðum hverfum,“ segir hann.
Hermann bætir við að þróunin sé hröð í lausnum sem nýta þær samgönguleiðir sem þegar eru til, kosta ekki mikið, greiða sig sjálfar, menga lítið og eru auk þess sveigjanlegir valkostir.
„Sem dæmi væri hægt að ferja stóra hópa af fólki frá tónleikum eða íþróttaleikjum að bílastæðum sem lægju lengra frá,“ segir Hermann sem hefur trú á að svona lausnir henti vel í okkar litla borgarlandi vegna þess sveigjanleika sem svona farartæki bjóða upp á.
„Sem dæmi gætu verið forritaðar leiðir úr Borgartúninu og nærliggjandi götum og upp í Laugar í hádeginu. Þannig dregið úr umferð og öngþveiti. Alla vega tel ég hugmyndir að Borgarlínu vera lausn 20. aldarinnar en alls ekki þeirrar 21.“
