„Herbert Guðmundsson bankaði upp á í gærkvöldi og til að gera langa sögu stutta á ég núna geisladiska og dvd myndasafn af öllum hans helstu smellum,“ segir Júlían J. K. Jóhannsson, kraftlyftingamaður og íþróttamaður ársins 2019, í skemmtilegri færslu á Twitter.
Þetta væri svo sem svo ekki í frásögur færandi nema fyrir það sem Júlían segir í kjölfarið og hefur fengið marga til að brosa: „Það sem ég á hins vegar ekki er geisladiska- eða dvd spilari. En það er annað mál skilst mér.“
Herbert er annálaður sölumaður og eru þeir eflaust ófáir Íslendingarnir sem hafa tekið á móti honum og jafnvel keypt bók eða geisladisk.
Í viðtali í hlaðvarpsþætti Sölva Tryggvasonar í nóvembermánuði rifjaði Herbert upp að hann hefði alltaf verið söluhæsti sölumaðurinn hjá Erni og Örlygi. „Þegar ég hætti þar var ég búinn að selja bækur fyrir 380 milljónir!“
Það er því kannski ekki að undra að einn sterkasti maður landsins hafi verið eins og smjör í höndunum á Herberti í gærkvöldi. Þess má geta að Herbert á afmæli í dag og fagnar nú 67 ára afmælisdegi sínum. Óskum við honum innilega til hamingju með daginn.
Herbert Guðmundsson bankaði upp á í gærkvöldi og til að gera langa sögu stutta á ég núna geisladiska og dvd myndasafn af öllum hans helstu smellum.
— Júlían J.K.J. (@JkjJulian) December 15, 2020
Það sem ég á hins vegar ekki er geisladiska- eða dvd spilari. En það er annað mál skilst mér.
