Mikill styr hefur staðið um Klöru Bjartmarz, framkvæmdastjóra KSÍ, undanfarið. Í viðtali í tíufréttum RÚV í gær sagðist hún ekki ætla að láta af starfi þrátt fyrir að ýmsir hefðu krafist þess.
Kristrún Heimisdóttir lögfræðingur kemur Klöru til varnar á Facebook.
„Klara var varaformaður Samtakanna 78 þegar stórir sigrar unnust í þeirri baráttu og hefur leitt og fylgt eftir allri uppbyggingu kvennalandsliðanna í þau 27 ár sem hún hefur starfað hjá KSÍ. Hún hefur barist við ómenningu og karlrembu alla tíð. Hún er feministi, baráttukona fyrir homma, lesbíur og aðra minnihlutahópa og hefur alltaf og mun alltaf beita sér fyrir réttindum og velferð þessara hópa,“ skrifar Kristrún.
Hún veltir fyrir sér hvað félaginu Íslenskur toppfótbolti gangi til með aðför sinni að Klöru.
„Íslenskur toppfótbolti er karlaklúbbur sem hefur aldrei svo vitað sé haft áhyggjur eða áhuga á kynbundnu ofbeldi né sérstakan áhuga þátttöku kvenna í fótbolta, heldur hinu að hagsmunir ríkustu félaganna á Íslandi fái meiri forgang. Einungis stærstu félögin fá að vera innanborðs í ÍTF og kvennaknattspyrna er þar jaðarsett,“ segir Kristrún. Auknir peningar í fótboltanum hafi skapað togstreitu og margir álíti hann einungis fjárfestingatækifæri.
„Nú er það til í dæminu að líta á fótbolta fyrst og fremst sem fjárfestingatækifæri og gera út leikmenn í fjáraflaskyni. Þá hverfur mennskan og fótboltinn breytist í harðan heim þar milljónadrengjum leyfist allt svo lengi sem þeir skora.“
Hún lýkur pistlinum svohljóðandi:
Að Íslenskur toppfótbolti grípi tækifæri og nýti krísu til að taka völdin í KSÍ og ná yfirráðum yfir sjónvarpspeningum er ekki vænleg leið til að útrýma eitraðri karlmennsku úr búningsklefum fótboltaheimsins á Íslandi, svo það sé sagt.
Meðal þeirra tæplega 200 sem líkar við færsluna eru Salvör Nordal, umboðsmaður barna, Ólafur Stephensen, framkvæmdastjóri Félags atvinnurekenda, Guðmundur Andri Thorsson þingmaður Samfylkingarinnar, Einar Kárason rithöfundur, Gerður Kristný rithöfundur og Sigrún Björk Jakobsdóttir, fyrrverandi bæjarstjóri á Akureyri.
