Helmingur af þeim afla sem boðinn er upp á íslenskum fiskmörkuðum er sendur óunninn úr landi, alls um 50 þúsund tonn – og hefur magnið fari vaxandi á síðustu árum. Sérstaka athygli vekur í þessum efnum að útflutningur á óunnum þorski hefur aukist um 80 prósent á síðustu árum.
Lilja Rafney Magnúsdóttir, formaður atvinnuveganefndar Alþingis hefur vakið athygli á þessari þróun, en hún segir hana bagalega, einkum og sér í lagi fyrir fiskvinnslur án útgerðar sem eigi erfiðara en ella að afla sér hráefnis. Fyrir margar vinnslur sé þetta hreinlega spursmál um nægilegan afla til að geta haldið fólki í vinnu. Þar fyrir utan sé það fráleitt umhverfisvænt að flytja óunninn fisk úr landi.
Lilja Rafney, sem er gestur fréttaþáttarins 21 á Hringbraut í kvöld, segir að atvinnuveganefnd hafi kallað til fjölmarga hagsmunaaðila í sjávarútvegi vegna þessa máls á síðustu vikum og muni halda áfram að kalla eftir skýringum á þessari óheillaþróun. Sjálf velti hún því fyrir sér hvort íslenskir útgerðarmenn sjái hag sinn í því að koma óunnum fiski af Íslandsmiðum í sínar eigin fiskvinnslur í austanverðri og sunnanverði Evrópu þar sem vinnuafl er ódýrara en á Íslandi. Í öllu falli skjóti það skökku við að tugþúsundir af óunnum fiski fari úr landi á hverju ári á meðan atvinnuleysi blasi við fjölmörgum landsmönnum, hringinn í kringum landið.
