Helgi Áss Grétarsson, lögfræðingur og frambjóðandi Sjálfstæðisflokksins í borginni segir stjórnarhættir vinstri meirihlutans í borginni hafa einkennst af draumórum upp á síðkastið.
„Reykjavíkurborg hefur verið stýrt af vinstri flokkum um langt skeið. Andi stjórnunarháttanna undanfarin ár hefur að mínu mati einkennst of mikið af hugmyndafræðilegum draumórum. Viðhorfið til einkabílsins er skýrasta dæmið um þetta. Með allt að því markvissum hætti hefur verið staðið gegn uppbyggingu stofnbrautakerfisins og víða hefur verið þrengt að umferð einkabílsins. Lappirnar hafa verið dregnar við að tryggja þjóðhagslega hagkvæmar framkvæmdir, svo sem eins og Sundabrautina. Vöntun á slíkum framkvæmdum dregur einnig úr uppbyggingu nýrra hverfa,“ skrifar Helgi í aðsendri grein í Morgunblaðinu í dag.
„Til verður lóðaskortur sem er til þess fallinn að hækka fasteignaverð, svo sem margir finna á eigin skinni þessa dagana. Staðreyndir og raunsæi í stað skýjaborga Í skýrslu um tilraunaverkefni um eflingu almenningssamgangna á höfuðborgarsvæðinu 2012-2022, sem kom út í ársbyrjun 2021, kom m.a. fram að árið 2019 voru 982 fólksbifreiðar á skrá á hverja þúsund íbúa en þær voru 570 árið 2011. Þessi tölfræði, ásamt öðrum tölulegum gögnum, sýnir að íbúar á höfuðborgarsvæðinu vilja nota einkabílinn,“ bætir hann við.
Helgi segir að þrátt fyrir mikinn tilkostnað undanfarinn áratug hefur lítið gengið að auka hlut almenningssamgangna. „Samt er haldið áfram á þeirri vegferð að útfæra lausn á vanda samgöngukerfis höfuðborgarsvæðisins í krafti hugmyndafræði en ekki staðreynda.“
„Í grein samgönguverkfræðingsins Þórarins Hjaltasonar, „Góðar samgöngur eru fyrir alla“, sem birt var 7. janúar sl. á kjarninn.is, er með ítarlegum hætti fjallað um fyrirliggjandi útfærslu á borgarlínunni. Samanburður er gerður á þeim fyrirætlunum við reynslu borga í NorðurAmeríku sem eru sambærilegar að stærð og höfuðborgarsvæðið.“
„Niðurstaðan er skýr, fyrirliggjandi útfærsla borgarlínuverkefnsins er óskynsamleg miðað við aðra valkosti. Kjarni málsins Umferðartafir, sérstaklega á háannatímum, eru núna óþarflega miklar. Fyrir þessu ástandi eru rökréttar ástæður. Það hefur skort á fjárfestingu í samgönguinnviðum fyrir einkabílinn. Úr þessu þarf að bæta. Slíkar framfarir í þágu umferðar einkabílsins útiloka ekki leit að hagnýtum leiðum til að auka nýtingu almenningssamgangna og annarra samgöngumáta, svo sem fyrir gangandi vegfarendur og reiðhjólafólk. Breytinga er þörf við stjórn Reykjavíkurborgar. Hugmyndafræðilegar kreddur eiga ekki að stýra för. Það er kjarni málsins,“ skrifar Helgi að lokum.
