Helgi Hrafn og Þor­steinn í hár saman: „Þetta er ekki líðandi“ – „Ég biðst ekki af­sökunar“

Til nokkuð harðra orða­skipta kom á milli Þor­steins Sæ­munds­sonar, þing­manns Mið­flokksins, og Helga Hrafns Gunnars­sonar, þing­manns Pírata, á Al­þingi í dag.

Þor­steinn steig í pontu og fór fram á að for­seti þingsins og for­sætis­nefnd tækju til sér­stakrar um­ræðu orð­ræðu þing­manna á Al­þingi. Til­efnið voru orð sem Helgi Hrafn lét falla í gær­kvöldi þegar verið var að ræða frum­varp fé­lags­mála­ráð­herra um flótta­fólk og inn­flytj­enda­ráð.

„Hér í gær­kvöldi var orð­ræða í gangi sem for­seti hlýtur að taka til at­hugunar á­samt for­sætis­nefnd þar sem teiknuð var upp mynd af heilum þing­flokki með lítið bursta­skegg og allir greiddir til vinstri. Þetta er ekki líðandi, herra for­seti, og það er ekki líðandi að heill þing­flokkur sé sakaður um til­burði sem nálgist gyðinga­hatur það komandi frá stuðnings­manni borgar­stjórnar sem setti við­skipta­bann á Ísrael. Hversu mikil getur hræsnin orðið,“ spurði Þor­steinn og bætti við:

„Og í gær­kvöldi, herra for­seti, þá var það þannig að popúlisti úr ein­stefnu­flokknum gat ekki staðist mátið að hefja upp sama söng og hinn sið­prúði fé­lags­mála­ráð­herra, sem er ný­ber á því að hafa farið á svig við lög um ráð­herra­á­byrgð og þing­sköp, blandaði sér í hópinn til að mála þennan hræði­lega þing­flokk þessum gyðinga­haturs­homma­fælnistimpli sem er al­ger­lega ó­þolandi.“

Helgi Hrafn steig í pontu og sagðist ekki sjá eftir einu orði.

„Í um­ræðum hérna í gær tók ég fyrir ýmsar birtingar­myndir and­úðar á minni­hluta­hópum, svo sem hommum og gyðingum í gegnum tíðina. Þetta að ég skuli nefna þessa birtingar­mynd fór ber­sýni­lega fyrir brjóstið á Mið­flokknum og skyldi kannski engan undra. Ég vildi bara koma hingað upp og segja það: Ég tek það nærri mér sem þing­maður og lýð­ræðis­sinni að hér sé kallað eftir því að þagga niður í þing­mönnum fyrir að gagn­rýna Mið­flokkinn. Ég valdi orð mín í gær af kost­gæfni og ná­kvæmni. Ég stend við þau. Ég mun í­treka þau. Ég biðst ekki af­sökunar og læt Mið­flokkinn um að leið­rétta það sem honum finnst hafa farið úr­skeiðis í gær.“

Þor­steinn var ó­sáttur við þetta svar Helga og sagði aug­ljóst að nú teljist menn sekir þar til sak­leysi er sannað. „Það er náttúr­lega í sjálfu sér á­huga­vert að hátt­virtur þing­maður skuli taka það upp að fyrra bragði að hann muni ekki biðjast af­sökunar. Það hefur enginn beðið hann um það, ekki nokkur einasti maður.“

Helgi steig í pontu á nýjan leik og sagðist vera vanur því að biðjast af­sökunar ef hann gerir eitt­hvað sem hann sér eftir eða telur að hefði mátt betur fara.

„Það er ein­fald­lega ekki til­fellið nú […] Ég sé ekki eftir stöku orðið sem ég lét falla hér í gær og ekki enn þá eftir neinu sem ég hef sagt í dag. Það sem ég sagði í gær var það að viljandi eða ó­viljandi, með­vitað eða ó­með­vitað, þá er orð­ræða Mið­flokksins í málinu sem við vorum að ræða hér í gær og öðrum málum sem varða út­lendinga til þess fallin að auka út­lendinga­and­úð í landinu. Hvort sem það er ætlun Mið­flokksins eða ekki þá ber hann á­byrgð á því. Ég mun halda á­fram þessum mál­flutningi eins lengi og Mið­flokkurinn heldur uppi sínum. Þannig er það og verður þetta eitt­hvað tekið til um­ræðu, að fara eitt­hvað að þagga niður í þing­mönnum hér sem gagn­rýna Mið­flokkinn, þá erum við komin á ein­hvern stað sem ég held að enginn annar þing­maður vilji sjá hér á Al­þingi.“