Helgi: Galið fyrir­komu­lag og hreinn dóna­skapur

„Lands­menn eru orðnir dofnir gagn­vart fram­komu af þessu tagi,“ segir Helgi Magnús­son, stjórnar­for­maður Torgs ehf., í grein sem birtist í Frétta­blaðinu í dag. Torg ehf. á og rekur meðal annars Frétta­blaðið og Hring­braut.

Í grein sinni fyrir Helgi um víðan völl og gagn­rýnir meðal annars gegndar­lausa út­þenslu ríkis­báknsins. Hann segir að fyrir utan veiru­vandann sem hrjáð hefur lands­menn undan­farna mánuði sé þessi út­þensla helsta ógnin við ís­lenskt hag­kerfi. Hann segir að vonandi séum við farin að sjá fyrir endann á veiru­vandanum en ekkert bendi til þess að nokkurt lát verði á út­þenslu ríkis­báknsins.

„Það er stór­háska­legt og getur haft al­var­legar af­leiðingar ef ekki verður hugar­fars­breyting meðal æðstu ráða­manna ríkisins. Hér er ekki verið að amast við því að ríkið verji auknum fjár­munum til grunn­þjónustu, sér í lagi heil­brigðis­kerfisins. En á­stæða er til að vara við ó­ráð­síu og sóun víðs vegar í rekstri hins opin­bera. Byrjum á toppnum,“ segir Helgi sem nefnir svo nokkur dæmi máli sínu til stuðnings.

Hann bendir á að stjórn­mála­flokkarnir á Al­þingi hafi til að mynda komið sér saman um að nær þre­falda fram­lög til sín sjálfra. Þannig eiga 728 milljónir króna á fjár­lögum næsta árs að renna til rekstrar stjórn­mála­flokkanna. Auk þess greiðir ríkis­sjóður laun 28 að­stoðar­manna þing­flokkanna.

„Lengst gengur enda­leysan á því sviði hjá þing­flokki sem telur tvo þing­menn en hefur þrjá að­stoðar­menn á launum hjá skatt­greið­endum! Um­rætt fyrir­komu­lag er vitan­lega galið og hreinn dóna­skapur við eig­endur ríkis­sjóðs, skatt­greið­endur sem þurfa að borga brúsann. Það er raunar merki­legt hve litla at­hygli þessi fram­koma stjórn­mála­flokkanna vekur. Lands­menn eru orðnir dofnir gagn­vart fram­komu af þessu tagi.“

Helgi nefnir fleiri dæmi, til dæmis á­form um að láta reisa fimm hæða glæsi­hýsi við hlið Al­þingis sem á að hýsa kontóra fyrir þing­menn og starfs­fólk Al­þingis.

„Allt þetta fólk hefur á­gæta vinnu­að­stöðu og það ætti ekki að vera for­gangs­mál í því kreppu­á­standi sem ríkir á Ís­landi að byggja slíkt mont­hús yfir skrif­stofu Al­þingis, að ekki sé nú talað um að ætla að troða 1.200 fer­metra skrif­stofu­byggingu inn á lóð stjórnar­ráðs­hússins gamla og eyði­leggja á­sýnd þess, bara til að geta komið sí­vaxandi fjölda em­bættis­manna ráðu­neytisins fyrir. Enginn skortur er á vönduðu leigu­hús­næði í ná­grenninu sem fá má á sí­fellt hag­stæðari kjörum vegna aukins fram­boðs.“

Grein Helga má lesa í heild sinni á vef Frétta­blaðsins.